R só ofrecerá 4G aos clientes que máis paguen

xoves, 21 de xullo do 2016 Marcus Fernández

Dende comezos de ano sábese que o operador de telecomunicacións R vai abandonar a rede móbil de Vodafone para funcionar con Orange, decisión que estaría motivada principalmente ante a negativa de Vodafone a achegar conectividade 4G aos clientes móbiles de R, e este cambio de cobertura parece estar a iniciarse estes días se atendemos ás tarifas que figuran na páxina web da compañía, nas que xa se recolle a conectividade 4G nas novas contratacións cun mínimo de 3 GB de datos ao mes, ou sexa, que a meirande parte dos clientes da compañía continuarían a quedar sen 4G pese a ter que padecer o cambio de cobertura (o que suporá un cambio de tarxeta SIM que probablemente comece a realizarse nos vindeiros días previsto para despois do verán e que iríase aplicando paulatinamente entre os clientes da compañía).
Entendemos que a partires de agora os usuarios que se dean de alta en liñas móbiles de R recibirán unha tarxeta SIM para operar baixo a rede de Orange, e de contar con tarifa 1 (que custa 8 euros/mes) tarifa R 2GB (que custa 10 euros ao mes) ou a plana 13 (a 13 euros/mes) carecerán de datos en 4G, de xeito que a tarifa plana máis económica con 4G sería a plana 22 (que achega 3 GB de datos por 22 euros/mes), mentres que nas tarifas de pagamento por minuto habería que pagar un mínimo de 16 euros/mes para gozar do desexado 4G.
Dende R aseguran que a rede 4G de Orange dará cobertura ao 93% da poboación galega e a portabilidade dos clientes actuais á nova rede móbil realizarse de xeito progresivo, completándose o cambio de operador a primeiros do ano que vén.
ACTUALIZACIÓN: Dende R dan conta de que para o cambio de operador non será preciso mudar de tarxeta SIM, pero si unha nova configuración do APN do terminal móbil, que comunicarase aos clientes cando proceda. Tamén matizan que a súa tarifa con 4G máis económica custa 13 euros/mes (aínda que non é unha afirmación moi rigorosa, porque estamos ante unha liña adicional que precisa ter, como mínimo, unha tarifa móbil que custe 22 euros/mes).

JPEG - 88.1 KB
A páxina web de R detalle que o 4G só estará dispoñible para as tarifas móbiles máis caras

PUBLICIDADE