Rexeitan o acordo de Anthropic por vulneración de dereitos de autor

O acordo histórico de 1.500 millóns de dólares anunciado por Anthropic para pechar unha demanda colectiva de autores quedou en suspenso tras as críticas do xuíz federal William Alsup, da Corte do Distrito Norte de California. O maxistrado considera que o pacto, presentado como un dos maiores en materia de copyright nos Estados Unidos, está «lonxe de estar completo» e podería acabar sendo imposto pola forza aos autores.
Na vista celebrada o 8 de setembro, Alsup asegurou sentirse «enganado» e esixiu máis información sobre o proceso de reclamación dos membros da clase. O xuíz amosou a súa preocupación polos mecanismos de notificación, pola lista definitiva de obras incluídas e polo risco de que autores ou editores poidan reclamar máis adiante, o que deixaría a Anthropic sen a «limpeza xurídica» que espera a cambio do pagamento millonario.
O acordo, que afectaría a uns 465.000 libros descargados de forma ilícita para adestrar sistemas de intelixencia artificial, prevé compensacións de arredor de 3.000 dólares por obra. Sería, segundo os avogados, un referente para posibles solucións con outras compañías investigadas por usos semellantes, como OpenAI, Meta ou Midjourney.
Justin Nelson, de Susman Godfrey LLP, avogado dos autores, defendeu que o equipo legal «se preocupa profundamente de que cada reclamación lexítima reciba compensación». O xuíz, con todo, advertiu de que en moitas accións colectivas «os membros da clase levan a peor parte» unha vez fixado o diñeiro e esixiu un proceso de notificación «moi bo» que permita optar con claridade por entrar ou quedar fóra.
Alsup tamén chamou a atención sobre o «exército» de letrados implicados no reparto, incluíndo representantes do Authors Guild e da Association of American Publishers, lembrando que os honorarios dependerán do diñeiro realmente distribuído aos reclamantes e non se pagarán «avogados engadidos» cos fondos do acordo.
Desde a Asociación de Editores Americanos, a súa presidenta, Maria A. Pallante, acusou ao tribunal de «demostrar unha falta de comprensión de como funciona a industria editorial», advertindo de que a visión do xuíz podería derivar en «litixios colaterais entre autores e editores durante anos».
Alsup marcou o 15 de setembro como prazo para que as partes entreguen a lista definitiva de obras. Ademais, instruíu que o formulario de reclamación obrigue a todos os titulares de dereitos dunha obra a aceptar o acordo: se un só deles opta por quedar fóra, esa obra non estará cuberta. En caso de disputas sobre a titularidade, deberán resolverse nos tribunais estatais.