Ricardo Cao toma posesión do seu cargo como reitor da UDC

A UDC xa conta oficialmente con novo reitor para os vindeiros seis anos: Ricardo Cao, investigador do CITIC da UDC. O reitor electo tomou posesión do seu cargo este martes 16 de xaneiro nun acto institucional no Paraninfo ateigado de personalidades, días despois de que o escrutinio das votacións lle fose favorábel a Cao con 2.983 votos ponderados fronte aos 1.590 que tivo o outro candidato, Fermín Navarrina. Tamén tomaron posesión dos seus cargos os membros do novo equipo de goberno na UDC.
O acto de investidura estivo presidido polo presidente da Xunta de Galicia, Alfonso Rueda Valenzuela, e contou coa presenza do conselleiro de Cultura, Educación, Formación e Universidades, Román Rodríguez González; o reitor da Universidade de Santiago de Compostela, Antonio López Díaz; o reitor da Universidade de Vigo, Manuel Reigosa Roger; a alcaldesa da Coruña, Inés Rey García; e os presidentes dos Consellos Sociais das tres universidades públicas galegas: Antonio Abril Abadín, da Universidade da Coruña; Cecilia Sierra Rey, da Universidade de Santiago de Compostela; e Ernesto Pedrosa Silva, da Universidade de Vigo. Tamén asistiu o reitor saínte da UDC, Julio Abalde Alonso.
A sesión comezou coa intervención de Julio Abalde, quen pronunciou o seu último discurso como reitor en funcións, felicitando a Ricardo Cao e ao seu equipo e desexándolles “moita sorte nesta nova etapa”. Abalde fixo un repaso do que foi o seu período de goberno, que entre outras vicisitudes, pasou por unha pandemia “á que a UDC fixo fronte grazas á súa infraestrutura tecnolóxica e metodolóxica, e da que coa responsabilidade e colaboración de toda a comunidade universitaria a institución saíu reforzada”.
Destacou o impulso a proxectos estratéxicos, como “a creación do Centro Mixto UDC-Navantia, que está a colaborar na modernización e dixitalización do estaleiro de Ferrol” e “a Cidade das TIC, de transformación da Fábrica de Armas nun espazo de innovación tecnolóxica e que, xunto coa Facultade de Informática, o Centro de Investigación en Tecnoloxías da Información e as Comunicacións (CITIC), e a decisión do Goberno de situar a Axencia Española de Supervisión da Intelixencia Artificial (AESIA) na cidade da Coruña, son unha oportunidade para Galicia de ser unha referencia europea e mundial nun sector de futuro, xa de presente, como é a Intelixencia Artificial”.
O reitor saínte agradeceu emocionado ás persoas que o acompañaron durante o seu mandato, coas que formou un “equipo conxuntado e solidario, pero sobre todo, un grupo de amigos e amigas que traballamos nun proxecto común e ilusionante en defensa dunha universidade pública, galega, de calidade e innovadora”.
Tras o seu discurso de despedida, Abalde entregou o bastón de mando e a medalla de reitor a Ricardo Cao, quen a continuación tomou posesión do seu novo cargo, seguido da nova secretaria Xeral, Marta García Pérez, e o resto das persoas que compoñen o equipo de goberno.
O novo reitor afirmou que desenvolverá a súa acción de goberno baixo o lema que entende a universidade pública feita entre todas as persoas; “por e para todas as persoas”, puntualizou. “Toda a comunidade universitaria ten que ser escoitada”, indicou, “mais tamén ten que poñerse mans á obra para facer da UDC a mellor universidade posíbel”, engadiu.
Cao resumiu as propostas do seu equipo de goberno de cara ao futuro, tomando tres versos do himno galego como referencia: “Os tempos son chegados”, “Esperta do teu sono” e “Os bos e xenerosos”.
Segundo Cao, “os tempos son chegados de facer unha aposta clara e inequívoca pola universidade pública de calidade. Neste sentido, recordou que entre os aspectos positivos da nova Lei Orgánica do Sistema Universitario (LOSU), se atopa o aumento do financiamento ás universidades públicas ata chegar ao 1% do PIB no ano 2030. “Temos que aproveitar o establecido na LOSU para conseguir que as administracións públicas, e nomeadamente a Xunta de Galicia, incrementen o financiamento ás universidades”, comentou.
Con “esperta do teu sono”, Ricardo Cao referiuse á necesidade de acometer cambios, algúns deles estruturais. “A renovación xeracional do persoal, e nomeadamente a do persoal docente e investigador, é unha necesidade urxente”, afirmou. “Tamén o é intensificar a participación da comunidade universitaria nos órganos de goberno e nos procesos de decisión, afondando na corresponsabilidade na gobernanza, mudando o que haxa que mudar e traballando arreo de cara aos obxectivos fixados”, engadiu.
Co verso “os bos e xenerosos”, o novo reitor resume algúns aspectos que considera fundamentais e “que están no ADN da acción de goberno desenvolvida nos últimos 20 anos na UDC: a igualdade de oportunidades para o alumnado e tamén para o persoal, a xustiza social e a rendición de contas”, mais tamén cuestións como “o aumento da eficiencia na xestión e a consecución dos obxectivos de desenvolvemento sustentábel (ODS)”.
Neste sentido, Cao asegurou que “a acción de goberno do seu equipo vaise guiar polos principios de humanización, equidade (incluíndo a igualdade e a atención á diversidade) e participación” e que “se porá en práctica de xeito inminente na elaboración duns novos Estatutos e na reforma da relación de postos de traballo”.
Ademais, o incremento da internacionalización da Universidade, a captación selectiva de talento docente e investigador, así como do talento xurdido na propia UDC “serán elementos clave no futuro inmediato”, indicou, engadindo que “estes procesos podemos e debemos facelos tecendo alianzas estratéxicas, tamén co sector produtivo e con outros axentes sociais”.
Cao realizou unha mención especial á Intelixencia Artificial e a ciencia de datos como disciplinas “indispensábeis para acometer cambios que melloren a calidade de vida dos seres humanos” e avogou polo seu sometemento a unha regulación axeitada por parte das axencias de supervisión que se creen na Unión Europea ou nos distintos Estados, como a AESIA, con sede na Coruña.
Finalmente, o presidente da Xunta, Alfonso Rueda, foi o encargado de pechar o acto, quen felicitou ao novo reitor e desexoulle éxitos no seu mandato. Ademais, na súa intervención tamén puxo en valor “o importante papel que desempeña o sistema universitario galego á hora de configurar a Galicia do futuro”. Por iso, ratificou unha vez máis, que “os campus galegos seguirán contando co apoio e colaboración da Administración autonómica”.
Sobre Ricardo Cao
Ricardo Cao, investigador do CITIC da UDC, conta cunha ampla experiencia nos eidos da estatística e as matemáticas, que inclúen máis de 200 traballos de investigación e colaboracións con científicos de todo o mundo.
O seu labor destacouse especialmente no proxecto COVIDBENS, onde combinou o servizo público nun momento social crítico co desafío científico de desenvolver un modelo estatístico eficiente, aplicábel non só ao COVID-19 senón tamén a outras problemáticas sanitarias como a gripe.
Desde 2008, o CITIC da UDC foi unha plataforma fundamental para Ricardo Cao, permitíndolle desenvolver proxectos singulares centrados na funcionalidade estatística. Recentemente, o Instituto Nacional de Estatística (INE) recoñeceu a versatilidade da súa traxectoria outorgándolle o Premio Nacional de Estatística, unha distinción colectiva que resalta a importancia do traballo en equipo na investigación.
O novo reitor destaca o factor humano como “o principal valor que define o seu traballo”; tamén para abordar cuestións tan de actualidade como a Intelixencia Artificial, “unha ferramenta de enormes posibilidades”, nas súas palabras.
Considera ademais, respecto do seu labor vindeiro á fronte da UDC, que unha das prioridades da universidade debe ser “estreitar a súa colaboración coas empresas e as administracións, así como fomentar a participación a todos os niveis, esencial nun mundo globalizado e para abrir o horizonte da UDC á internacionalización”. E engade: “Trátase de xerar unidades de investigación conxuntas que permitan competir no escenario global”. Neste sentido, a aposta estratéxica polos centros singulares como o CITIC, con profesionais TIC altamente demandados hoxe en día, “constitúe unha excelente panca de impulso”, avanza.