Samsung aposta polo audio premium cos novos Galaxy Buds4

Samsung presentou a nova xeración de auriculares sen fíos Galaxy Buds4 e Galaxy Buds4 Pro, unha actualización que busca consolidar a marca no segmento máis esixente do audio móbil, apostando pola fidelidade sonora, a comodidade prolongada e a integración intelixente co ecosistema Galaxy.
A compañía surcoreana aposta por un redeseño completo, achegando un formato máis delgado, cabezais máis pequenos e unha nova estética tipo blade que mellora a estabilidade sen comprometer o estilo. O estoxo transparente, tamén renovado, reforza esta identidade visual e facilita a interacción diaria.
O modelo Pro incorpora un woofer máis amplo que aumenta case un 20 % a superficie efectiva do altofalante, acompañado dun tweeter dedicado para cubrir todo o espectro sonoro. A combinación permite reproducir audio de alta fidelidade a 24 bits/96 kHz en dispositivos compatibles, un salto notable respecto a xeracións anteriores. A Cancelación Activa de Ruído tamén evoluciona: agora analiza en tempo real o entorno e a forma do oído para aplicar algoritmos máis precisos, mentres que a función Super Clear Call mellora a claridade das chamadas mediante modelos de aprendizaxe automática.
Samsung integra acceso directo a axentes de IA como Bixby, Google Gemini ou Perplexity mediante comandos de voz, sen necesidade de tocar o teléfono. No modelo Pro engádense xestos de cabeza para xestionar chamadas ou activar o asistente, un movemento que apunta a unha interacción máis natural co ecosistema Galaxy.
A serie Galaxy Buds4 chega ao mercado acompañando os novos Galaxy S26 e xa poden mercarse de xeito anticipado a 179 euros na súa versión ordinaria e a 249 euros na súa versión Pro, ambos en cor branca ou negra, mentres que a versión Pro tamén conta cunha edición en cor ouro rosa exclusiva da tenda en liña de Samsung.