Samsung rodará en Lalín un novo spot publicitario de seu
venres, 21 de abril do 2017
Samsung, a referencial compañía coreana de
electrónica e tecnoloxías, vén de anunciar que vai rodar en Lalín
un novo spot publicitario de seu. A
nova foi dada a coñecer onte polo concelleiro de Turismo, Francisco
Vilariño, que anunciou que o audiovisual resultante terá como fío
condutor a promoción dun televisor de última xeración, sendo o
emprazamento elixido para tal presentación (de maneira íntegra) o
interior do consistorio lalinense, un referente na construción
actual de infraestruturas públicas (deseñado, como lembraremos,
polos arquitectos Mansilla e Tuñón). Segundo engadiu Vilariño, o
elemento crucial da rodaxe será a escaleira helicoidal do vestíbulo
do edificio.
O conselleiro amosou a súa “enorme
satisfacción” pola nova achegada por Samsumg, porque “despois de
moito traballo, esta firma tan recoñecida a nivel mundial escolleu
Lalín para gravar un dos seus anuncios”. Vilariño tamén
salientou a “gran repercusión” que vai ter para este municipio a
emisión dun spot que se poderá ver en todo o mundo e que terá un
alcance de millóns de persoas.
A produtora que vai realizará o vídeo comercial
é Team Works Spain, que estará dirixido por Lily Coates e
GabinYoungs, responsaeis de The Apiary, compañía con sede de seu en
Australia. Trátase dun proxecto de enorme dimensión onde Lalín
competiu con outras localizacións de Alemaña, Brasil ou Xapón. O
spot vaise gravar os días 29 e 30 deste mes coa participación dun
equipo de 60 persoas. Francisco Vilariño engadiu que o anuncio
servirá como “carta de presentación única do noso concello” e
asegurou que “terá unha gran repercusión a nivel socioeconómico”.