Telefónica e o Grupo VARPA do CITIC revolucionan a oftalmoloxía con IA e 5G

De esquerda a dereita (superior): Jorge Novo e Marcos Ortega; o doutor Fernández Vigo; e os especialistas en oftalmoloxía do CIOA José Ignacio Fernández-Vigo, Ignacio Almorín Fernández-Vigo e Bachar Kudsieh/ Na fileira inferior o membro do CITIC Pablo Guillemette e o responsábel do proxecto en Telefónica Innovación, Juan Cambeiro

A Universidade da Coruña (UDC) achegou este luns máis detalles do proxecto de Intelixencia Artificial en 5G no que participan os investigadores do Grupo de Visión Artificial e Recoñecemento de Patróns (VARPA), con centro de operacións no Centro de Investigación TIC (CITIC). Segundo recordou a UDC, o sistema Ocuexplorer 5G é unha ferramenta de teleoftalmoloxía que opera achegando asistencia ao profesional deste ámbito poñendo a súa disposición tecnoloxías ópticas e de telecontrol, comunicacións 5G e ferramentas de IA para axudar na prevención de diagnóstico de doenzas oculares.
O proxecto está impulsado por Telefónica, en colaboración con Nokia, o Centro Internacional de Oftalmología Avanzada Prof. Fernández Vigo, Idronia e o Grupo de Visión Artificial e Recoñecemento de Patróns (VARPA).
O caso de uso Ocuexplorer 5G, que xa se está utilizando na clínica oftalmolóxica do Prof. Fernández-Vigo en Madrid e que se probará na cidade de Vigo, desenvólvese no marco da primeira convocatoria de subvencións para impulsar o 5G do Ministerio de Asuntos Económicos y Transformación Digital a través de Red.es con fondos FEDER.
Segundo engade a UDC máis en detalle, Ocuexplorer 5G consiste “nun dispositivo oftalmolóxico baseado en ópticas e sensores electrónicos avanzados que veñen do mundo da Fórmula 1 (extrema sensibilidade en contornas lumínicas complicadas) e pode levarse preto do paciente para realizar varias probas oftalmolóxicas (análises multicapa das distintas partes da anatomía do globo ocular)”. Ademais, grazas á cobertura 5G, “esta información de gran volume captada por Ocuexplorer (ata 500 imaxes por segundo de alta resolución e baixa compresión) é transmitida en tempo real a un sistema avanzado de Intelixencia Artificial que realiza unha análise previa das mesmas”.
Este sistema de IA baseado nos algoritmos de Visión Artificial permite realizar un screening de cantidades masivas de información e notifica a un oftalmólogo cada vez que se identifique, por exemplo, unha retinografía con parámetros que se saian da normalidade, “para que sexa examinado de maneira axeitada polo doutor”, explica a UDC, engadindo que “en caso necesario, un médico podería conectarse remotamente ao dispositivo e tomar o control remoto do dispositivo para realizar probas máis exhaustivas”.
A finalidade deste dispositivo, conectado por 5G e apoiado na IA, é dobre: por unha banda facer accesíbel a oftalmoloxía máis avanzada a colectivos que hoxe en día teñen difícil acceso a estes servizos (como poden ser zonas rurais, zonas afastadas de calquera núcleo urbano ou pacientes con problemas de mobilidade) e pola outra ofrecer aos oftalmólogos unha ferramenta diagnóstica que lles permita mellorar a súa eficiencia, aplicando os seus coñecementos naqueles casos onde realmente se necesitan.
Para a fase de validación de Ocuexplorer con pacientes reais, Telefónica contou con Nokia para o despregamento de cobertura 5G na cidade de Vigo, así como o despregamento dun centro de edge computing na Coruña, que aloxará a capacidade de cómputo necesaria para o diagnóstico e, nun futuro, permitirá o telecontrol do robot por parte dun especialista en remoto grazas á súa baixa latencia.