Televés acolleu o lanzamento dunha iniciativa europea de seguridade para o fogar smart, o proxecto GHOST
martes, 9 de maio do 2017
As
instalacións
de Televés en Compostela veñen de acoller o lanzamento de GHOST,
proxecto europeo para equipar cun extra de seguridade smart o
ámbito do fogar conectado. Na posta en marcha oficial desta
iniciativa europea fíxose saber, máis en detalle, que o seu
principal obxectivo é “desenvolver unha aplicación doada de
empregar para mellorar a privacidade no fogar dixital conectado á
Internet das Cousas”, o que se coñece como IoT (polas súas siglas
en inglés). E todo isto, explicou a empresa compostelá, “tirando
proveito das tecnoloxías máis avanzadas dispoñíbeis para a dita
finalidade”. A compañía engadiu tamén que a seguridade e o extra
de confianza que introduce GHOST será sen dúbida un pulo para o
mercado doméstico IoT.
O
proxecto, de feito, salienta por poñer os máis innovadores sistemas
de salvagarda e protección de datos e comunicacións (tecnoloxías
como blockchain ou deep packet inspection) ao alcance
de todos nós, con independencia de que sexamos ou non expertos.
GHOST,
informou Televés, ten un orzamento de 4,9 millóns de euros e un
período de desenvolvemento de 36 meses. Conta co respaldo do
Programa Marco de Investigación e Innovación da Unión Europea
Horizonte 2020, baixo o acordo de subvención número GA-740923. Dez
empresas, organizacións e universidades de seis países forman parte
do proxecto, que está liderado por Televes.
GHOST
prevé “unha contorna transparente de ciberseguridade para todos os
europeos que viven nun mundo conectado”, engadiu a firma de
Santiago, engadindo que o esforzo de adaptación dos consumidores á
dita contorna “será mínimo” e valeralles, entre outras cousas,
para seren conscientes dos riscos da seguridade cibernética e, en
consecuencia, estarán mellor habilitados para actuar de maneira
axeitada ante eles. Neste senso, Televés lembra que a misión última
do proxecto é “obter a primeira xeración de solucións de redes
de seguridade aplicábel para fogar intelixente e habilitada por
software innovador”, ou sexa, por software con capacidade para
marcar un antes e un despois na evolución da tecnoloxía.
“A
tecnoloxía GHOST”, explicaron fontes da firma compostelá de
equipamentos para as telecomunicacións avanzadas e o fogar dixital,
“aumentará o nivel e a eficacia da automatización dos servizos de
ciberseguridade existentes, mellorará a autodefensa do sistema e
abrirá a caixa negra de ciberseguridade aos consumidores, xerando
confianza a través de ferramentas avanzadas de transparencia
derivadas dos modelos mentais dos usuarios finais”.
En
termos prácticos de aplicación, o software resultante fará cousas
como integrarse nas pasarelas de redes domésticas e realizar
análises de rede e inspección pormenorizada de paquetes no camiño
do recoñecemento de patróns sospeitosos, aplicará aprendizaxe de
máquina e exame de datos para a detección de comportamento
malicioso, e levará a cabo unha avaliación de riscos en tempo real.