Twitter matará a aplicación de TweetDeck o 15 de abril
xoves, 17 de marzo do 2016
- O novo xeito de amosar a cronoloxía de Twitter é opcional
Os cambios en Twitter parecen querer chegar todos de vez, e
non só o anunciado
sistema que muda a cronoloxía dos usuarios para destacar os chíos máis importantes pasa agora a estar activado
de xeito predeterminado (sendo posible desactivarse tal opción en calquera
momento), senón que a compañía do paxaro azul unifica o sistema de
identificación de twitter.com, analytics.twitter.com e tweetdeck.com, inicia
unha serie de melloras na experiencia da versión web de TweetDeck e,
finalmente, fai o preocupante anuncio de que o 15 de
abril abandonarán o soporte da aplicación de escritorio para Windows de
TweetDeck, medida que claramente molestará aos seus moitos milleiros de
usuarios, xa que estamos ante a ferramenta de escritorio para a xestión de
varias contas de Twitter simultaneamente máis popular (por ser oficial de
Twitter e completamente de balde).
Lembremos que hai
tres anos Twitter xa abandonou as versións móbiles e AIR de TweetDeck, deixando
só as versións nativas de escritorio e a versión web que será a única que se
manterá a longo prazo, aínda que dende Twitter detallan que para facilitar o
uso de TweetDeck no futuro recomendan acceder a TweetDeck dende o navegador
Chrome, ir alí ir á opción de Engadir ao Escritorio (dispoñible no menú de Máis
Ferramentas) e, de marcar a opción de “abrir como fiestra” facilitarase o uso
da versión web como se estivésemos ante a versión de escritorio da aplicación
(aínda que con melloras a nivel de integración de contidos multimedia). Temos
así que o cambio realmente non tería que ser traumático, aínda que para que os
usuarios actuais de TweetDeck poida resultarlles cómodo cómpre seguir as
mencionadas recomendacións de Twitter.