Un investigador do CITIC, finalista no prestixioso certame ECCOMAS

Un investigador do Centro de Investigación TIC (CITIC), José Germán López Salas, vén de resultar finalista no certame ECCOMAS PhD Awards 2016, dirixido a recoñecer a amosar perante o mundo as mellores teses internacionais en materia de computación aplicada á ciencia e á enxeñaría. A tese de López Salas, enxeñeiro informático con premio extraordinario amais de investigador do CITIC, foi proposta pola Sociedade Española de Matemática Aplicada para o premio europeo ECCOMAS ao mellor traballo de investigación doutoral. ECCOMAS, para quen non o saiba, é unha comunidade europea para o estudo e o impulso dos recursos avanzados de cálculo a gran escala.
Esta organización científica promove os esforzos de universidades, institutos de investigación e industrias europeas que actúan nos ámbitos da metodoloxía numérica e a simulación por computador (en enxeñaría e ciencias aplicadas) para abordar problemas sociais e tecnolóxicos críticos. Dentro das actividades de ECCOMAS atópanse os premios europeos ao mellor PhD, no que José Germán conseguiu situarse entre os finalistas.
A tese do investigador do CITIC xunta tecnoloxías de modelado, análise matemática e simulación numérica con vistas a afrontar problemas que xorden en finanzas cuantitativas. Concretamente, a través do seu traballo estúdanse modelos de volatilidade estocástica para a evolución de activos e tipos de interese, con obxecto de calibrar os devanditos modelos a datos reais cotizados nos mercados e a valoración de diferentes produtos derivados. Segundo fai saber o propio investigador, este é un eido de investigación que inclúe non só desafíos no plano matemático senón tamén no computacional.