Unha alumna de Ourense gaña o concurso da camiseta de Galiciencia 2026, centrada na ciberseguridade

Hannah Carvajal Seidel, alumna de cuarto curso de Primaria do Colexio Plurilingüe Santa María de Ourense (Maristas), é a gañadora do concurso para deseñar a camiseta oficial de Galiciencia 2026. Baixo o título Picaches, o seu debuxo amosa varios peixes rodeados de anzois, que simbolizan algúns dos riscos e perigos aos que estamos sometidos no noso día a día na contorna dixital: as loias (fake news), a información bancaria, as redes sociais ou os nosos datos persoais.
Un xurado de expertos decidiu a proposta gañadora, da que se valorou a súa creatividade e a conexión coa temática desta edición da feira, a ciberseguridade.
Galiciencia, a maior feira científica da nosa comunidade (organizada pola Tecnópole de Ourense), celébrase desde 2006 coa finalidade de achegar a ciencia á mocidade, en particular ao estudantado de Primaria, Educación Especial, Secundaria, FP e Bacharelato. O encontro, que terá lugar os días 13, 14 e 15 de maio, desenvólvese en colaboración coa Consellería de Economía e Industria.
O lema elixido este ano é a Ciberseguridade. Para o deseño da camiseta oficial da feira, convocouse un concurso entre o alumnado de Primaria de toda Galicia. As propostas debían ter como punto de referencia calquera obxecto ou contorna relacionada coa temática desta edición.
Ao certame presentáronse un total de 300 debuxos procedentes de 15 centros educativos de Primaria de toda a comunidade. A rapaza premiada recibirá camisetas para toda a súa clase, con exemplares tamén para os seus profesores e familiares. Así mesmo, distribuiranse camisetas entre o persoal da organización de Galiciencia e entre o alumnado que presente os seus proxectos na feira.