Unha aplicación fai doado pedir cita no médico dende o móbil

SergasApp facilita a solicitude de cita no médico dende practicamente calquera lugar

Probablemente un dos servizos en liña máis populares na nosa comunidade autónoma é o de solicitude de citas de atención primaria do Servizo Galego de Saúde, e para facelo accesible en practicamente calquera momento e lugar Manuel Rego Casasnovas (traballador de Igalia) desenvolveu, a xeito de experimento, unha aplicación móbil chamada SergasApp, dispoñible polo momento para dispositivos cos sistemas operativos Android, BlackBerry, Symbian e WebOS grazas ao framework de desenvolvemento PhoneGap (o que fai doado que tamén poida chegar ao iPhone no futuro). A versión para Android pode descargarse de balde a través de Google Play.
Esta ferramenta que permite a solicitude, consulta e cancelación de citas de atención primaria do SERGAS dende o móbil destaca especialmente pola posibilidade de poder almacenar os datos de varias tarxetas sanitarias nun único terminal, facendo doada a solicitude de citas para todos os membros da familia.
A aplicación SergasApp publícase baixo licenza pública xeral de GNU versión 3, estando dispoñible o seu código fonte no seu repositorio Git.