Unha conferencia na Coruña explorará o desenvolvemento visual de El Parque Mágico

venres, 29 de marzo do 2019 Marcus Fernández

O vindeiro 12 de abril chegará aos cines o filme de animación El Parque Mágico, de Paramount Pictures, dirixida por Dylan Brown (colaborador de filmes como Bichos, Toy Story 2, Monstruos S.A., Buscando a Nemo, Ratatouille e Los Increibles), encargándose da súa animación en 3D o estudio español Ilion Animation Studios, oportunidades que quixeron aproveitar dende a organización de Mundos Digitales (evento que recuncará na Coruña os días 11-13 de xullo na súa edición número 18) para organizar unha conferencia en primicia na que parte do equipo que desenvolveu o filme analizará os retos técnicos e artísticos da produción.
Esta actividade celebrarase o venres 5 de abril ás 18:00 horas na sede de Afundación Obra Social Abanca na Coruña, e permitirá descubrir o desenvolvemento visual dos escenarios e personaxes de El Parque Mágico, dende o seu deseño até a iluminación final.
A xornada busca ser a antesala da vindeira edición de Mundos Digitales, e os que queiran acudir a este interesante evento poden solicitar unha invitación (para 1 ou 2 persoas) a info@mundosdigitales.org, sendo o acceso de balde até completar aforo.
El Parque Mágico narra a historia dun abraiante parque de atraccións que esperta a imaxinación dunha nena moi creativa: un día máxico, mentres June vai polo bosque de camiño a casa, atopa un vello vagón de montaña ruso abandonado e monta nel para descubrir que está en Wonderland, un parque de atraccións que creará na súa mente e do que case non gardaba recordos. Todas as atraccións e personaxes cobraron vida, pero sen a presenza de June o caos ameaza con apoderarse do lugar, polo que a cativa terá que reorganizar Wonderland para que volve ser un lugar marabilloso.

Tráiler de El Parque Mágico

PUBLICIDADE