Unha entrevista coa directora xeral de X ilustra as contradicións da compañía

Linda Yaccarino deixou ver a pantalla de inicio do seu móbil, onde non figura a aplicación de X

A situación de X/Twitter non deixa de ser polémica, e un dos principais problemas que ten a compañía é a mala imaxe que dá Elon Musk coa súa conduta errática e os seus posicionamentos ante o que considera que é liberdade de expresión (mentres promove contidos antisemitas e retrógrados), de xeito que o principal traballo da directora xeral Linda Yaccarino é tranquilizar aos anunciantes, para o que concedeu entrevistas nos últimos días que reflicten o complicado da súa situación.
No marco da Code Conference puidemos ver a Linda Yaccarino respondendo a preguntas da xornalista da CNBC Julia Boorstin, quen tivo que insistir en numerosas ocasións en case todas as súas preguntas, xa que Yaccarino evitaba responder directamente, buscaba constantemente desviar a atención sobre os asuntos críticos e non cesaba de dar informacións xenéricas e imposibles de verificar sobre a súa empresa, dando a impresión de que o seu discurso estaba totalmente fóra da realidade, chegando a admitir que os cambios que se realizan en X/Twitter son decisión de Elon Musk, e que os traballadores da compañía non renden contas ante Yaccarino.
A directiva pola súa banda defende que X/Twitter segue a xogar un papel crucial na comunicación en tempo real, asegura que ten unha grande actividade que non para de medrar (pese a que haxa informes que indiquen que X está no peor nivel de descargas nos últimos 10 anos e que o nivel de uso está en mínimos) e asegura que dende que ela está á fronte da compañía «o 90% dos 100 maiores anunciantes volveron á plataforma». Incluso chega a asegurar que a empresa está a piques de dar beneficios operativos, algo sumamente difícil de crer, cando é unha compañía nunha profunda crise que non cesa de acumular débedas en alugueres, servizos e mesmo no ámbito laboral (aínda non pagou as compensacións por despedimento prometidas a milleiros de traballadores).
Pero unha das curiosidades da entrevista foi, sen dúbida, o momento no que Yaccarino amosou a pantalla do seu teléfono móbil para ilustrar que a xente se informa da actualidade a través do smartphone, e puido verse que na pantalla de inicio do seu iPhone non está a aplicación de X, o que non deu precisamente boa imaxe (lembra a cando cazan a algunha celebridade promocionando un smartphone con Android en redes sociais mentres publica o contido cun iPhone).
Acto seguido tamén quixo esquivar a pregunta sobre a caída de descargas de X (que parece estar motivada polo feito de mudar o nome da aplicación), chegando a mencionar Julia Boorstin que actualmente até teñen un maior nivel de uso aplicacións como Telegram ou o Reloxo de Samsung.
Cando Boorstin sacou o tema de que Elon Musk pretende facer X unha plataforma totalmente de pagamento, e preguntou cantos usuarios estiman que perderán con tal movemento, Yaccarino evitou en repetidas ocasións responder, evitando dar datos actuais da plataforma e rexeitando dar datos sobre o futuro, insistindo en que non hai ningunha decisión tomada.
Ao tratar o tema da moderación de contidos, as declaracións de Yaccarino foron sumamente difíciles de crer, pois afirmou que agora contan con ferramentas de moderación de contido dirixidas a empresas que antes non existían (e que múltiples denuncias públicas deixan claro que non funcionan) cando se lle preguntaba realmente pola moderación de contidos en xeral, e moi especialmente en materia política (xa que están próximas unha eleccións nos EE.UU.). Mentres a entrevistadora sacaba á palestra que X estaba a despedir aos responsables da moderación de contidos políticos e da loita contra a desinformación, Yaccarino dicía o contrario, pese a que foi o propio Elon Musk quen recoñeceu que prescindira deses traballadores por considerar que o seu traballo colidía co seu concepto de liberdade de expresión.
Confíase en que nas vindeiras semanas X dea información sobre as medidas que adoptará de cara á información política e electoral, pois de non adoptar un mínimo de medidas podería ter serios problemas coas autoridades estadounidenses, como parece que xa está a ter coas autoridades europeas, que consideran a X como a maior divulgadora de desinformación das plataformas sometidas á Lei de Servizos Dixitais.