Vitae achega en marzo a edición 45 do seu curso de xestión de proxectos áxiles con Scrum
mércores, 1 de marzo do 2023
As
tecnoloxías achegan coñecemento continuo e obrigan a quen traballa
directamente con elas a vivir en modo case permanente de aprendizaxe.
Fórmulas para acadar esta excelencia profesional hai moitas
(fórmulas para irmos ao mesmo ritmo cás transformacións e garantir
o éxito dos nosos proxectos), pero sen dúbida os cursos de Vitae
Consultores, que botan luz sobre as moitas e variadas vertentes do
fenómeno tecnolóxico, son ferramentas perfectas para comezar con bo
pé. Un curso especialmente indicado para situarnos na vangarda
destas transformacións é o Curso
sobre Dirección e Xestión de Proxectos TIC Áxiles con Scrum,
que chega á súa 45 edición nesta recta final do inverno, da man da
formadora Josefina Alonso e da consultora Vitae.
O curso
constituirá unha ocasión óptima para formarnos nos recursos que
garanten a máxima calidade nos nosos proxectos tecnolóxicos e,
tamén, nas metodoloxías que nos permiten coñecer polo miúdo as
necesidades e requirimentos dos destinatarios deses proxectos.
O
curso, que achega a opción de Certificación Scrum Manager Nivel
Experto, celébrase en formato de aula virtual, os días 17, 20, 22,
24, 27 e 29 de marzo..
Estamos ante unha actividade formativa
de 16 horas que nos pon ao día nas metodoloxías coas que aplicar
modelos de tráballo áxiles, uns modelos que engaden eficacia e
rendibilidade e que, a maiores, permiten que establezamos a meirande
proximidade cos clientes do proxecto no que estamos a traballar,
sabendo o que precisan en todo intre, mesmo anticipándonos ás súas
demandas e acadando a mellor comunicación posíbel.
Segundo
Vitae, a orixe deste curso está, tamén, nas vantaxes de
anticiparnos ás nosas propias demandas. Ou sexa, de preparar o
camiño a percorrer para saber cara a onde dirixirnos en canto se dea
unha disxuntiva. Desta maneira nolo explica Vitae: “Tendo en conta
o moito que evoluciona o mercado e a necesidade das empresas de
adoptar medidas para satisfacer de maneira eficaz e rápida as
demandas do cliente, propoñemos este curso sobre o uso de Scrum en
proxectos e desenvolvemento de software”. Esta metodoloxía,
engaden dende Vitae, permitirá a implicación e auto-organización
de todo o equipo profesional dunha corporación para fixar un punto
de partida e definir o proceso de desenvolvemento que se executará
durante o proxecto.
Nun plano máis detallado acerca do programa
do curso, neste abordaranse as diferenzas entre as devanditas
metodoloxías áxiles e as súas vantaxes e inconvenientes con
respecto a metodoloxías pesadas como CMMI, PMI e ISO, “dando unha
perspectiva global aos asistentes para que adquiran os coñecementos
precisos para seleccionar a metodoloxía de dirección segundo as
necesidades de cada proxecto”.
A
encargada de impartir estes contidos será novamente Josefina Alonso
Nocelo, enxeñeira superior en Informática e na actualidade
directora da área de Operacións en DIHGIGAL HUB (Asociación para
la Transformación Digital de la Industria Gallega). Josefina Alonso,
ademais, posúe unha ampla experiencia nos eidos do desenvolvemento
de software e do asesoramento empresarial e a centros de I+D
(traballou para a Axencia Europea do Espazo, o CTAG, o CITIC,
Tecnocom, SIVSA, Seresco, Coremain ou Balidea, entre outras moitas
entidades).