Vodafone faise con 90 Mhz do espectro 5G
xoves, 26 de xullo do 2018
Vodafone
España vén de adquirir 90 Mhz (megahercios) contiguos de espectro
na banda do 3,7 Ghz. E fíxoo por un total de 198,1 millóns de
euros e tras unha poxa convocada polo Ministerio de Economía e
Empresa. O obxectivo da operadora, con esta adquisición, é “ofrecer
servizos de datos de telefonía móbil nestas frecuencias”. A
empresa informou que a contía abonarase, tal e como está previsto
na poxa, en 20 pagos anuais cun interese do 2,35%. Ademais, o
espectro adquirido ten unha vixencia de 20 anos.
Para
os que non o saiban, os hercios son un xeito de medir a cantidade de
repeticións dunha onda electromagnética nun segundo, amais da súa
frecuencia. O espectro actual abrangue dende frecuencias moi baixas,
de aproximadamente tres hertz por segundo, até as de maior
frecuencia. Entre os dous puntos atópanse todas a metodoloxías
empregadas para transmitir por vía aérea radio, televisión e
datos. A banda dos 3,7 Ghz sitúase no rango da super alta frecuencia
e esta é de especial relevancia para a tecnoloxía de
telecomunicacións 5G, a radioastronomía, as comunicacións por
microondas, as redes sen fíos, os radares máis avanzados, as
comunicacións por satélite ou a televisión por satélite.
Vodafone
España utilizará este espectro de 3,7 Ghz xunto cos 20 MHz TDD, dos
que xa dispón na banda de 2,6 Ghz, para despregar servizos 5G,
ofrecendo velocidades superiores ao gigabyte por segundo e unha menor
latencia para así mellorar, nas súas palabras, “as aplicacións
de vehículos e máquinas conectadas, así como os sistemas
industriais automatizados e realidade virtual e aumentada”.