Youtubeir@s celebra este 8 de xuño unha xornada de convivencia e creatividade
mércores, 5 de xuño do 2019
O
certame Youtubeiras.gal, o
concurso destinado a ateigar as redes (poñendo o foco no YouTube e
na nosa mocidade) de vídeos en galego, ten este mes de xuño dúas
grandes citas para xerar máis comunidade youtubeira, impulsar
o radio de acción do certame e optimizar ao máximo as
contribucións. O concurso, que está mergullado na súa terceira
edición (baixo un epígrafe que fala por si só da arela renovada de
espallamento: Conéctate á comunidade e multiplícate),
celebra este 8 de xuño na Coruña unha cita de convivencia,
creatividade e debate. Por
certo que quen queira
presentar contribucións ao certame ten todo o verán para facelo
(até o 27 de setembro).
Unha
das grandes novidades deste ano foi a posta en marcha de recursos
extra para facer medrar o número e a calidade de vídeos e persoas
creadoras en galego, amais de fortalecer as conexións e as
interrelacións da comunidade que producen contido en Youtube. Froito
destes obxectivos convocáronse as dúas xuntanzas devanditas.
A
primeira delas, Youtubeir@s en conexión, celebrarase o
vindeiro 8 de xuño na Coruña e estará aberta á participación de
todas as persoas que no panorama galego creen vídeos no Youtube. A
finalidade é achegar un espazo para reflexionar sobre o panorama
creativo nesta plataforma dende varios ámbitos, a cuestión
lingüística na Rede, a perspectiva temática ou o eido de fomento
de públicos. Esta xornada de convivencia, dinamizada por Ben Curiosa
(equipo de profesionais ao servizo do coñecemento e a creatividade
en común) celebrarase entre as 10.30 e as 13.30 horas no Centro
Cívico Cidade Vella da Coruña (Rúa da Veeduría, 2). As prazas
para participar son limitadas e cómpre inscribirse a través de
formacion@youtubeiras.gal.
O
segundo evento, Lista de reprodución ao vivo, será o 28 de
xuño entre ás 18.00 e ás 20.00 horas no edificio CEA (Centro de
Estudos Avanzados) da USC (Finca de Vista Alegre, Santiago de
Compostela). Esta cita quere emular o espírito das bibliotecas
viventes ou mesmo as partidas de xadrez simultáneas, de xeito que as
persoas creadoras agardarán no seu posto as visitas dos/as
“espectadores/as”. Esta será a metodoloxía: cada youtubeir@
levará temas preparados para analizar e o público, que irá rotando
entre os diferentes postos, poderá facer preguntas e interactuar cos
chamados “vídeos vivos”. Cada un destes encontros durará un
máximo de 20 minutos. Ao final desta rolda individual, abrirase a
todo o público para poñer en común e compartir experiencias. O
acto estará dinamizado por Xandobela (profesionais da educación e
da dinamización sociocultural). O público que desexe participar
deberá inscribirse antes do 26 de xuño a través do correo
formación@youtubeiras.gal.
Como
lembraremos, no concurso
Youtubeir@s
están a traballar arreo os
servizos de normalización lingüística dos concellos da
Baña, Rianxo Ames, Carballo, Cedeira, A Coruña, O Grove, Moaña,
Ourense, Ribadeo, Pontevedra, Santiago e Teo, das universidades da
Coruña, Santiago e Vigo e da Deputación da Coruña co obxectivo de
fomentar a creación de contidos na Rede na nosa lingua.