Bueu volve xuntar o mellor do Social Media de Galicia

luns, 3 de xuño do 2013 Marcus Fernández
JPEG - 74.1 KB
Francisco Gaña, director de MexilOnseTuits, inaugurou o encontro no Centro Social do Mar de Bueu

O pasado domingo o Centro Social do Mar de Bueu serviu de escenario para a celebración da segunda edición do Festival Social Media de Galicia, MexilOnseTuits, encontro ao que acudiron máis de 150 integrantes galegos do mundo das redes sociais e o marketing en liña para compartir unha experiencia conxunta e asistir ao acto de entrega dos Premios MexilOnseTuits. Este evento da axenda tecnolóxica de Galicia é posible en boa medida grazas á colaboración do Concello de Bueu e da Federación de Comerciantes e Industriais do Morrazo (FECIMO), que estiveron representados polo rexedor local, Félix Juncal, e o presidente de FECIMO, Xosé Bangueses, durante a inauguración deste festival dirixido por Francisco Graña.
Tras a apertura forma do encontro, Adrián Rodríguez, un dos responsables do blog Mola Viajar, explicou a súa experiencia na Rede que o levou a dar a volta ao mundo narrando a viaxe a través da Internet, e que tamén o levou a gañar na pasada edición de MexilOnseTuits o premio ao mellor blog turístico. Rodríguez centrou a súa intervención nas posibilidades da web para dar abrir portas e dar pé a oportunidades, que no seu caso están enfocadas principalmente ao seu lecer, pero que tamén ten repercusións na súa face profesional, dándolle ás persoas que publican na Rede unha maior visibilidade de cara á súa futura repercusión e para consolidar a súa marca persoal.
A esta intervención práctica seguiulle un relatorio do profesor universitario de Ciencias Sociais e da Comunicación, e tamén blogueiro, Daniel Martí, que quixo expor o traslado que están a ter os mecanismos da comunicación ás redes sociais, dando conta de distintos fenómenos dos que estamos a ser testemuñas e actores nos últimos tempos.

Premios MexilOnseTuits 2013

JPEG - 77.9 KB
Rubén Bastón recibiu o premio a Elogia

Unha vez rematadas as charlas que pretendían enmarcar o evento, subiu ao escenario Tomás Alonso, xornalista da TVG coñecido polo público principalmente pola súa participación no programa Larpeiros, que fixo de condutor da gala de entrega dos Premios MexilOnseTuits, que buscan recoñecer tanto os mellores traballos de marketing en social media como aos blogs máis destacables. O primeiro trofeo en atopar dono foi o de Mellor Axencia 2012, que foi parar a Elogia, recolléndoo Rubén Bastón, director de Social Media, SEO e CMO da compañía, que amosouse especialmente honrado por poder recibir o premio xa que é natural de Bueu, de xeito que o seu gozo era dobre.

JPEG - 92.1 KB
Turismo de Ourense fíxose co premio á mellor campaña en medios sociais

O recoñecemento á mellor campaña en medios sociais foi para a Sabores de Ourense, recollendo o trofeo Emilio Cuíñas, técnico da Concellería de Turismo de Ourense, que entendeu o galardón como o recoñecemento ao traballo que desenvolveron nos últimos 3 anos convertendo a súa campaña en toda unha marca recoñecible, con resultados a medio prazo “en tres ámbitos distintos: a transcendencia no sector hostaleiro da cidade, a repercusión nos medios de comunicación off line locais e galegos e a xestión da marca Ourense cun obxectivo de notoriedade online e nas redes sociais”.

JPEG - 112.1 KB
Tomás Alonso comunicou por teléfono a Dani Cornes que o seu vídeo resultara galardoado como mellor vídeo viral no MexilOnseTuits

Máis curiosa e orixinal foi a categoría de Mellor Vídeo Viral, da que resultou vencedor o vídeo musical paródico Rías Baixas Style, que provocou risas entre boa parte dos presentes e que, nun primeiro momento destacaba por non contar coa presenza do seu autor, Dani Cornes, o que levou ao presentador da gala a chamalo por teléfono en directo para comunicarlle a súa vitoria. Cornes sorprendido por gañar, sorprendeu minutos despois facendo acto de presenza en Bueu para agradecer o recoñecemento aos alí presentes.


Vídeo musical de Rías Baixas Style

Os mellores blogs do ano

JPEG - 98 KB
Vigo Low Cost é o mellor blog Informativo/Cultural da presente edición


Os cadernos de Internet recibían logo os seus premios en cinco categorías distintas, comezándose a súa entrega con Vigo Low Cost como mellor blog Informativo/Cultural, superando a outros proxectos interesantes como a orixinal proposta de Enxebre Markets e o blog de Briefing Galego.

JPEG - 372.1 KB
Mallando no Android recibiu o recoñecemento como mellor blog tecnolóxico


Máis clara estaba a vitoria na categoría de mellor blog tecnolóxico, que foi para a Mallando no Android, espazo integrado na rede de blogs Vencello, que é dos blogues en galego sobre tecnoloxía, que destaca por especializarse no mundo de Android para facerse un oco na web galega, e conseguindo así cubrir unha demanda de información na nosa lingua, como recoñeceron ao recibir a o trofeo que destaca o seu labor.

JPEG - 84.4 KB
Tras ser finalista o ano pasado, Vivir Galicia conseguiu despuntar como mellor blog turístico


A categoría de mellor blog turístico estaba moito máis rifada, pois contaba con proxecto moi completos como Equipaxe de Man e Chaveas, indo finalmente a parar a Vivir Galicia, blog que na anterior edición fora un dos finalistas.

JPEG - 73.8 KB
O mozo da autora de Fashion Low Cost encargouse de recoller o premio no seu nome


As dúas últimas entregas de premios da xornada foron sui géneris, pois estaban ausentes as autoras de ambos blogs, recollendo unha persoa os mesmos no seu nome. O mellor blog de moda recaeu en Flashion Low Cost, blog creado pola coruñesa Isabel Casanova como terapia tras un accidente de tráfico, sendo o seu mozo que, tras recibir o galardón no seu nome, quixo compartir co auditorio algunhas das mensaxes que reciben polo seu labor e que os animan a seguir adiante.

JPEG - 89.5 KB
Loly Llano leu unha mensaxe de agradecemento da autora de La Cocina de Lechuza, mellor blog gastronómico nos Premios MexilOnseTuits


Recoñeceuse a La Cocina de Lechuza como o mellor blog gastronómico, que foi recollido por Loly Llano do blog O Garfelo, quen leu un discurso de agradecemento de Pilar Martínez, autora do blog premiado.

O Festival Social Media de Galicia rematou coa entrega dunha mención especial ao equipo de O Tempo da TVG, pola súa aposta polas plataformas sociais, especialmente de Facebook, para achegarse á audiencia e tender unha ponte co público valéndose das posibilidades da Internet, do que tense clara constancia no propio espazo televisivo no que amósanse diariamente fotografías remitidas polos seareiros do espazo. Encargáronse de recibir este recoñecemento Ana Celia Vázquez e Diego Viaño, quen agradeceron o premio á organización e tamén á súa audiencia, que foi a peza chave deste éxito que demostra que a distancia que separa ambos lados da pantalla pode superarse grazas ás posibilidades das TIC.
Tras o certame, os asistentes puideron percorrer as rúas de Bueu para ver as alfombras florais que adornaban a celebración do Corpus Christi, visitar o Museo Massó e pasear pola ría en embarcacións tradicionais grazas á Asociación Os Galos de Bueu.

JPEG - 85.5 KB
O presidente de FECIMO, Xosé Brangueses, recibiu aos asistentes ao MexilOnseTuits destacando o papel dinamizador do Social Media no tecido empresarial
JPEG - 83.2 KB
Félix Juncal, alcalde de Bueu, agradeceu a presenza dos representantes do Social Media galego na súa vila
JPEG - 87.8 KB
Daniel Martín impartiu un relatorio titulado Tiempo de Redes Sociales. Reciclando secretos de la comuniación
JPEG - 96.1 KB
A ponencia de Adrián Rodríguez respondía ao título de Una nueva forma de mostrarse al mundo. Cultura Blogger y Social Media
JPEG - 121.6 KB
A xeito de sorpresa, o autor do Rías Baixas Style visitou o Centro Social do Mar para agradecer o seu premio



JPEG - 111.7 KB
Diego Viaño agradeceu á organización o recoñecemento do traballo do equipo de O Tempo na súa aposta polas redes sociais
JPEG - 85.3 KB
Ana Celia Vázquez non quixo esquecer aos seus seareiros, que son os que fixeron posible o éxito de O Tempo en Facebook

PUBLICIDADE