Centum, primeira aposta firme do Club de Investidores do Clúster TIC

O pasado mes de novembro constituíuse o Club de Investidores do Clúster TIC Galicia, tal e como informamos dende Código Cero facendo fincapé nas entidades fundadoras (un total de oito: Altia, Bahía Software,Clictic, Imatia, Itelsis, JDLV Investidores, Plexus e R) e nos seus obxectivos: investir en iniciativas emprendedoras da nosa terra baseadas nas novas tecnoloxías da información. Segundo recorda o Clúster, o club presentouse en sociedade na quinta edición do evento Clúster TIC Capital Network-CCN, cuxa edición saldouse con 9 propostas aspirantes. Agora, xa entrados de cheo en 2015, vén de facerse o primeiro investimento nunha delas. A primeira aposta do club é polo proxecto empresarial de Centum Research & Technology.
Trátase dunha compañía especializada no deseño, desenvolvemento e comercialización de sistemas aeronáuticos de misión, tanto para plataformas aeronáuticas tripuladas como drons, que se dirixen sobre todo a operacións no ámbito das emerxencias e a seguridade. Nesta liña insírese o proxecto LifeSeeker, un sistema de busca para persoas extraviadas desenvolvido conxuntamente entre os investigadores de Centum e os do centro tecnolóxico Gradiant. Máis en detalle, LifeSeeker é unha tecnoloxía aeronáutica concibido para o seu uso en misións de procura e rescate que permite a localización das persoas a través do seu teléfono móbil. LifeSeeker, confirma o Clúster TIC, xa foi probado con éxito a bordo de drons e helicópteros en contornas reais de alta montaña nas que, nunha extensión superior ao 100 quilómetros cadrados, acháronse 4 obxectivos previamente escondidos por efectivos dunha axencia de seguridade, en menos de 40 minutos.
Os membros do Club Altia, Bahía Software, JDLV Investidores e Plexus, son os que cubriron esta rolda de investimento. A súa iniciativa tomouse de forma coordinada con Xesgalicia, que tamén participa na rolda. Segundo explica o Clúster, entrada do Club de Investidores no capital de Centum “tamén arrastrou a outros investidores privados de renome nacional e internacional no sector aeronáutico, como o actual presidente do Cluster aeronáutico de Baviera, que acudiu á rolda de investimento tras a aposta do Club galego”. A compañía pecha así a a súa primeira rolda de investimento na que captou máis de 700.000 euros entre empregados, Club de Investidores do Cluster TIC (200.000), Xesgalicia (250.000) e investidores privados e prepara xa unha segunda rolda para o segundo semestre de 2015.
O Club de Investidores continúa analizando outros 4 proxectos, un dos cales xa foi aprobado para rolda final de negociación, prevendo abrir unha nova convocatoria de presentación de proxectos no mes de xuño.