Dygra presenta o seu terceiro filme na meirande feira do audiovisual independente

Os estudos galegos Dygra (especializados no audiovisual desenvolvido con ferramentas tecnolóxicas da última fornada) están estes días por terras de EE UU, dando a coñecer os seus produtos e tentando pechar ligazóns coas empresas que poden levalos até o público: as distribuidoras. Neste senso, un dos actos máis salientables da xira americana de Dygra foi a premiere en Los Ángeles da versión en inglés de Espírito do bosque (Spirit of the forest), un pase privado no American Film Market (AFM) no que estiveron presentes algúns dos principais distribuidores do planeta, segundo sinala o selo galego.
Na presentación do filme (que chega a EE UU tras o acordo de Dygra con Fantastic Films) na dita feira –considerado o máis importante do mundo no eido independente- participaron Manolo Gómez, presidente dos estudos galegos, e máis Roxane Barbat, presidenta de Fantastic.
Cómpre sinalar que Spirit of the forest é a terceira película de animación de Dygra e que, para estes mercados, contará nos labores de dobraxe con “importantes celebridades de Hollywood poñéndolle voz ós personaxes principais do filme”, segundo explicou a firma da Coruña nun comunicado.
Engadir que esta edición (a 28) do American Film Market de Los Ángeles terá as portas abertas até o 7 de novembro, atraendo a centos de creadores, produtores, distribuidores e exhibidores de todo planeta. Nesta convocatoria estanse a presentar 522 filmes en 34 linguas distintas.