Gradiant lembra os seus proxectos referenciais en seguridade co gallo do #DataPrivacyDay

Como viñamos anunciando os dias pasados, este xoves celebrouse o #DataPrivacyDay, o Día da Protección de Datos en Europa, un evento que se vén convocando dende hai unha década e que a Comisión Europea emprega para lembrarnos a importancia de pór en xogo maiores e medidas para salvagardar información e privacidade ao abeiro das novas canles dixitais. E máis tendo en conta que segundo as últimas estatísticas do Eurobarómetro, só unha minoría dos europeos (15%) cren que teñen o control total sobre a información persoal que proporcionan en Internet. Ao fío desta celebración, o centro tecnolóxico Gradiant lembrounos a importancia de seguir impulsando medidas e proxectos que incrementen a ciberseguridade e recordounos, tamén, as iniciativas deste ámbito que ten impulsado.
Por exemplo o proxecto SCAPE ou a solución SHADOW de rastrexabilidade documental, aos que cómpre engadir as iniciativas PRIPARE ou WITDOM, esta última dirixida en boa medida a fornecer unha nube máis segura e fiábel.
Segundo nos contan dende Gradiant, a proliferación e popularización de tecnoloxías “con enorme capacidade para recompilar datos”, como a Internet das Cousas (IoT) ou os chamados wearables (dispositivos para levarmos postos), xunto a cousas como a información masiva (Big Data) e as técnicas máis innovadoras de análise e xestión de datos (Data Analytics e Data Intelligence), fan cada vez máis necesaria a aplicación de políticas Privacy by Design e a posta en marcha de sistemas exhaustivos de avaliación de impacto previos á captación de datos. A este respecto, engaden dende o centro tecnolóxico galego, Gradiant é o referente galego en innovación TIC “e sempre ten a mira posta en protexer a privacidade”. Para isto, introduciuse de cheo no concepto Privacy by Design grazas ao proxecto europeo PRIPARE (Preparing the industry for Privacy-by-design), destinado en parte a facilitar medidas e tecnoloxías que garantan unha Internet libre de interrupcións, censura e vixilancia.
O centro tamén recorda os seus traballos noutros eidos das tecnoloxías para a seguridade, entre os que se inclúen a seguridade na Internet das Cousas, o procesado e almacenamento de datos sensíbeis na nube, a vídeoanálise, as técnicas forenses para material multimedia ou os sistemas biométricos e protección de templates biométricos. Solucións todas elas “que contribuíron a mellorar a competitividade das empresas que apostaron por innovar connosco”, engade Gradiant.