O CITIC achega un curso para afianzarnos no manexo de Apache Hadoop

venres, 16 de xaneiro do 2015 Fernando Sarasketa

O Centro de Investigación en Tecnoloxías da Información e das Comunicacións (CITIC), centro tecnolóxico impulsado pola Universidade da Coruña para fomentar a investigación avanzada e a transferencia de coñecemento, vén de presentar unha nova actividade formativa de seu. Trátase do Curso Administrador e Adestramento en Programación para Apache Hadoop, unha actividade a desenvolver nas propias instalacións do CITIC no Campus de Elviña (A Coruña) os días 20 e 21 de xaneiro, en horario de 10 a 14 horas e de 15:30 a 18:30 horas. O curso vén da man da Rede de Tecnoloxías Cloud e Big Data para HPC. O CITIC colabora na organización do mesmo.
O obxectivo desta convocatoria formativa é achegar coñecementos avanzados sobre Apache Hadoop, unha tecnoloxía aberta (un paquete de algoritmos open source) para o almacenamento e procesamento a gran escala de conxuntos de datos en clústers. O curso, de carácter práctico, prepara aos participantes en aqueles coñecementos e capacidades precisas para o manexo de Apache Hadoop no desenvolvemento de aplicacións para o procesado de datos. A convocatoria vai dirixida a membros da Rede de Tecnoloxías Cloud e Big Data para HPC. Para quen precise ampliar información sobre o curso, dicirlle que está dispoñíbel un PDF con datos completos sobre o que pon en xogo.

PUBLICIDADE