O CITIC contribuirá en Valencia a dar forma aos portos do futuro
venres, 8 de abril do 2016
Os vindeiros días 22 e
23 de abril, o Centro de Investigación TIC (CITIC) participará no
encontro ICT
Innovations in Shipping and Smart Port Management in the
Mediterranean Area, que terá lugar na Autoridade Portuaria de
Valencia e que ten por obxectivo promover a colaboración en I+D
arredor dos ámbitos do tráfico marítimo e a xestión e
infraestruturas dos portos. Búscase, polo tanto, xerar proxectos de
transferencia de coñecemento e cooperación entre diferentes frontes
ao abeiro das convocatorias europeas do marco de Horizonte 2020.
As xornadas insírese nas
actividades do grupo de asociacións de enxeñeiros de
telecomunicacións e TIC do FITCE (Forum For European ICT & Media
Professionals) de España, Grecia e Italia. O
CITIC participará activamente en tres mesas redondas, incluído un
debate sobre O porto do futuro, que conducirá Jesús M.
Díaz, responsábel de Transferencia Tecnolóxica e Innovación do
CITIC, acompañada pola coordinadora de Proxectos de I+D+i, Marta
Núñez Corbalán.
En detalle, o obxectivo
das xornadas é facer fronte común entre entidades de investigación
e empresariais dos devanditos países, por exemplo autoridades
portuarias, centros de I+D, universidades, empresas do ámbito TIC e
profesionais, todos eles unidos baixo a arela de compartir proxectos
e iniciativas para acadar sociedades, consorcios e proxectos
tecnolóxicos na conca mediterránea. Segundo explican dende a
organización, o porto de Valencia é hoxe por hoxe un dos máis
importantes da devandita beira litoral, e polo tanto “preséntase
como o emprazamento máis axeitado para debater e falar sobre tráfico
marítimo”, facendo fincapé na xestión intelixente (smart)
de recursos.