O CITIC salienta os resultados positivos acadados polo algoritmo de FilmYou
mércores, 11 de marzo do 2015
O CITIC está estes días
a achegar detalles sobre FilmYou,
plataforma distribuída de recomendación de películas da
que xa falamos en Código Cero con motivo da sesión de portas
abertas organizada polo centro tecnolóxico coruñés, na que
salientou que se trata dunha iniciativa Big Data que tira
partido da colección de filmes Netflix (con 100 millóns de
valoracións de 480.000 usuarios sobre 18.000 películas) con
interesantes posibilidades de uso en diversas plataformas
audiovisuais. FilmYou, que xurdiu dende a Área de Busca e
Recuperación de Información do CITIC, ten un motor de recomendación
baseado nun sofisticado algoritmo de filtrado colaborativo, capaz de
xerar consellos personalizados grazas a un sistema que cataloga esas
mesmas recomendacións ou votos.
Segundo informa o centro
galego, os resultados de eficacia do algoritmo froito da
investigación desenvolvida desde o CITIC e a Universidade Autónoma
de Madrid foron “moi positivos”. De feito, para facérmonos unha
idea, o algoritmo comezou a súa andaina (mesmo antes de ser
integrado a escala Big Data na plataforma FilmYou) cunha taxa
de eficacia de máis do 200%.
A plataforma, engaden
fontes do centro, inclúe funcionalidades de procura e navegación
sobre a devandita colección de películas que se manexa. A eficacia
e eficiencia da solución están avaliadas sobre a colección
liberada de Netflix, formada por 100 millóns de cualificacións de
máis de 480.000 usuarios anónimos sobre 18.000 películas. FilmYou
explota esa información para xerar recomendacións a todos os
usuarios do sistema. O funcionamento do algoritmo, “totalmente
parametizábel”, pode ser adaptado a outros dominios, como son a
recomendación de música, produtos ou novas de actualidade.
FilmYou baséase no
filtrado colaborativo. Así, o devandito algoritmo xunta usuarios de
gustos afíns por veciñanzas, ou sexa por comunidades que
determinarán a relevancia das películas para cada un deles. Cando
un usuario novo dáse de alta en FilmYou, debe valorar un número
determinado de películas cun valor entre 1 e 5, para que o algoritmo
identifique as súas preferencias e poida incluílo nunha veciñanza
afín. A partir de aí, comezará a recibir consellos.