O CPEIG recorre un proceso selectivo para técnicos superiores en Informática da Deputación de Coruña
venres, 10 de xuño do 2016
- Fernando Suárez, presidente do CPEIG, na pasada edición da Noite da Enxeñaría en Informática
Co gallo de traballar na defensa da profesión que
representa, o Colexio
Profesional de Enxeñaría en Informática de Galicia (CPEIG), vén
de interpoñer un recurso contra unha convocatoria da Deputación da
Coruña para elaborar listaxe de “aspirantes a nomeamentos e/ou
contratacións de persoal laboral temporal para postos de Técnico/a
superior de Informática”. A razón principal do recurso,
sinala o CPEIG, é que nas bases fíxase como requisito “unha serie
de titulacións que non garanten o bo desempeño do posto”.
De feito, lembra o Colexio, abránguese
licenciaturas de Psicoloxía, Socioloxía, Dereito, Publicidade e
Relacións Públicas, Xornalismo ou Económicas, “amais da
posibilidade de que tamén poidan presentarse licenciados/as ou
enxeñeiros/as en Informática”, explica a entidade profesional que
preside Fernando Suárez, que quere face fincapé na “necesidade”
de fixar a dita convocatoria nas/os tituladas/os en Enxeñaría en
Informática, non só por ser esta licenciatura a máis acaída para
os ditos postos, senón a única realmente acaída, subliña o CPEIG.
O recurso, presentado o pasado 26 de maio, sinala o
seguinte: “Parecería absolutamente disparatado pensar que para
deseñar unha ponte se ofertase un posto no que se admitise un
licenciado en Dereito ou un xornalista. Pois exactamente iso é o que
está facendo nesta convocatoria, tendo en conta que na actualidade
os sistemas informáticos se ocupan de cuestións estratéxicas e de
importancia vital na vida das persoas, polo que non poden ser
deixados en mans de xente que non estea suficiente e correctamente
preparada”.
No escrito asinado polo presidente do CPEIG,
Fernando Suárez, alégase que “sen discutir a capacidade para
outras cuestións das titulacións requiridas como requisito
establecido na resolución recorrida, as funcións só poden estar
cubertas de xeito idóneo por aquelas persoas que estean en posesión
do Título de Enxeñeiro/a en Informática”. E engade o presidente:
“Esa titulación é a única que abrangue todas as capacidades e
coñecementos necesarios para o desenvolvemento das funcións
requiridas polo temario”.