O Ubuntu Phone de Bq vén con galego de serie

xoves, 12 de febreiro do 2015 Redacción

O novo sistema operativo móbil inclúe innovacións, pero carece de importantes aplicaciónsComo avanzamos hai uns días dende Código Cero, o primeiro teléfono de Ubuntu púxose á venda este mes de febreiro e da man dun fabricante español, a compañía Bq, que xunto con Canonical (que confiou en Bq para lanzar este dispositivo co sistema operativo libre que Canonical impulsa) quere achegar outra alternativa open source diferente á de Android. Esta alternativa, como dixemos, ten nome propio e é o Bq Aquaris E4.5 Ubuntu Edition, que irrompe no mercado a un prezo de 169.90 euros e con dúas ou tres vantaxes moi significativas. Por exemplo: vai estar dispoñíbel a través de diversas operadoras telefónicas e, ademais, co galego de serie. Isto será unha comodidade moi salientábel para os usuarios da nosa terra, moitos dos cales terán recentes aínda na súa memoria os problemas e os atrancos sufridos para poder usar dispositivos iOS ou con Android na lingua de seu.
Segundo contan dende O meu Ubuntinho, hai outras vantaxes, amais da do galego como opción de entrada cen por cen dispoñíbel (confirmado por Canonical estes días nas redes sociais). Así, por vez primeira poderemos empregar nun teléfono móbil os Ámbitos (Scopes) que evitan ter que abrir e cambiar entre múltiples aplicacións. En troques disto, o sistema móbil Ubuntu traeranos todo o que necesitemos á pantalla.
Polo que respecta ao código fonte, estará aberto e cen por cen accesíbel para calquera desenvolvedor ou fabricante que desexe melloralo ou adaptalo ás necesidades concretas de usuarios específicos. Segundo engaden dende o dito blog galego, Canonical ten a previsión de achegar os 50 mellores aplicativos dispoñíbeis, incluído Facebook, Twitter, Dropbox, Evernote e Amazon. Tamén será compatíbel con HTML5 e, ademais, está concibido para ser plenamente operativo como sistema de escritorio en canto se emprega nunha pantalla de computador (a diferenza de iOS e Android).
A un nivel máis técnico, o Aquaris E4.5 Ubuntu Edition ten unha pantalla de 4,5 polgadas (cunha resolución de 960 x 540 píxeles), procesador MediaTek de catro núcleos a 1,3 GHz, 1 GB de RAM, 8 GB de almacenamento interno, cámaras de 8 e 5 Mpíxeles e dobre SIM.
O Bq Aquaris E4.5 Ubuntu Edition pode mercarse en Europa na páxina do propio fabricante.

PUBLICIDADE