O cofundador de Pixar, homenaxeado na vindeira edición de Mundos Dixitais
venres, 24 de xuño do 2011
Mundos Dixitais xa se albisca ao lonxe
(do 6 ao 9 de xullo), e xa hai quen conta os días á espera de poder mergullarse
de chego no máis avanzado desa mestura de cousas que son as linguaxes
audiovisuais collidas da man das tecnolóxicas, e todo coa vantaxe de non saír
da nosa terra (celébrase de feito na Coruña) e co beneficio engadido de que
sexan os de fóra, especialistas de toda índole en innovación ao servizo da
animación ou os videoxogos, os que teñan que vir acó. Entre estes
especialistas, segundo informa a organización deste evento e informan medios
como Galicia
Hoxe, cóntase Alvy Ray Smith, cofundador de Pixar, a casa responsable de
grandes éxitos como Toy Story ou Wall-E e en boa medida culpable de que as ferramentas de creación
dixital teñan obtido a carta de madurez creativa.
Precisamente Smith será un dos grandes protagonistas
do encontro, un dos de meirande relevancia no panorama europeo e que xa vai
pola súa décima edición. Por certo que Alvy Ray Smith estará na Coruña para
algo máis que falarnos da súa experiencia no que atinxe á apertura de novos
camiños audiovisuais: vén a recoller o premio especial que concede o festival
galego, desta volta concedido a Smith polo seu importante labor en materia de
creación de novos mundos, máis que nunca mundos dixitais.
Segundo se conta, Alvy recibirá na Coruña o máximo
recoñecemento do festival patrocinado pola Secretaría Xeral de Medios da Xunta
de Galicia, o Concello da Coruña, a Universidade da Coruña e Novacaixagalicia, “polo seu papel decisivo na contratación de
John Lasseter, animador de Disney que dirixiu a primeira película feita con
gráficos por computador, The Adventures of Andre Wally B., unha peza que se exhibe nos museos de arte contemporánea de todo o
planeta”.
Por certo que para quen queira informarse polo
miúdo de todas as cousas que se van ver en Mundos Dixitais, informarlle que
este luns está prevista a presentación desta entrega 2011 do evento, unha sesión
previa na que xa confirmaron a súa asistencia o secretario xeral de Medios,
Alfonso Cabaleiro, o reitor da Coruña, José María Barja, ou o director e
fundador do certame, Manuel Meijide.
Por certo que o festival pinta moi ben, está fóra
de toda dúbida, pero dende aquí queremos facer un chamamento para que se inclúa
unha versión en galego da páxina web, a
fin de contas estamos a crear selo e marca audiovisual, e unha lingua propia
(tal e como se está a demostrar en éxitos recentes alén das nosas fronteiras,
como Crebinsky ou 18 Comidas) tamén é un reclamo de
primeira.