Proban que o iPhone 4 ten un fallo de deseño (e Apple non quere ese tema nos seus foros)

martes, 13 de xullo do 2010 Marcus Fernández

Os enxeñeiros de Consumer Reports realizaron unha serie de probas no iPhone 4 confirmando que os problemas de recepción producidos ao tocar cos dedos ou a man nunha das súas esquinas non é un problema de software coma defende Apple, senón que trátase dun defecto de deseño do terminal, polo que, ao rematar estas análises conclúen rexeitándose a recomendar este terminal que consideran defectuoso.
Para as probas empregaron 3 terminais mercados en establecementos diferentes, á vez que as probas tiveron lugar nun ambiente controlado. Tamén someteron ás probas a un iPhone 3GS e un Palm Pre, ambos empregando o sinal da operadora AT&T (a que subministra o iPhone 4 nos EE.UU.), sendo o último móbil de Apple o que presenta perdas de sinal, e comprobando que o fallo pode solucionarse cun antiestético anaco de cinta aislante ou empregando unha funda para o móbil. Así pois, dende Consumer Reports consideran que o iPhone 4 é un terminal excelente no tocante á súa pantalla e á súa cámara, pero ao estar a falar dun móbil, consideran que non pode recomendarse o seu uso ata que corrixan o seu fallo de deseño que podo provocarlle problemas de cobertura, e continúan a recomendar o vello iPhone 3GS.
Esta polémica podería non ter un longo percorrido se non fose porque cando algún usuario fai referencia ao informe que cuestiona o deseño do iPhone 4 nos foros de Apple, o seu fío de conversa vese eliminado, algo que parece ser unha práctica habitual (ou sexa, que si existen fíos con comentarios negativos, pero só os que Apple admite). Esta reacción de Apple, lonxe de acalar as críticas, está a ter un efecto de bola de neve, de xeito que agora a análise de Consumer Reports é nova en boa parte da prensa tecnolóxica internacional.


Vídeo no que explican as probas ás que someteron ao iPhone 4

PUBLICIDADE