Unha aplicación móbil galega anímanos a facer turismo cinematográfico

A compostelá Zadia Software, integrada polos enxeñeiros técnicos en informática Gonzalo Mateo Sixto e Adrián Moreno Pena, estreou nas últimas horas na App Store unha aplicación de balde para iPhone e iPod Touch chamada PlotSpot e que pode resultar de grande interese para os que queiran practicar o cineturismo, pois esta ferramenta permite coñecer os lugares onde se desenvolve a historia dunha película, indicando o que acontece na localización, incluíndo ligazóns ás páxinas oficiais dos lugares da película ou á Wikipedia para afondar na información, fotografías das localizacións e a súa situación no mapa.
Inicialmente a aplicación chega con información de 7 películas: o Episodio IV de Star Wars, Sexo en Nueva York, Ocean’s Eleven, Piratas del Caribe: La Maldición de la Perla Negra, Indiana Jones y la Última Cruzada, Harry Potter y la Piedra Filosofal e 007: Casino Royale. Deste xeito, aos amantes do cine poderán visitar localizacións dos filmes, revivindo momentos dos seus personaxes favoritos.
PlotSpot contará con máis de 100 localizacións de todo o mundo, máis de 300 fotografías e incluso permitirá coñecer os eventos e monumentos importantes das cidades nas que aparecen os filmes e realizar reservas en hoteis ou restaurantes que serviran de escenario das nosas películas favoritas.