YouTube suprimirá tódolos vídeos do Mundial de Fútbol

Xa vai quedando menos tempo para o comezo do Mundial de Sudáfrica, e nos seareiros do fútbol internacional apercíbese xa certa inquietude non sempre ben disimulada. Para os que chegada a competición decidan descargar este desacougo na Internet, vendo e comentado nela as mellores xogadas, dicirlles que neste senso as novas non semellan ser moi boas, posto que YouTube xa anunciou que non vai dar acubillo ao mellorciño da competición logo de que a mesmísima FIFA llo pedira así expresamente e con vistas a protexer os dereitos de quen ten licenza para retransmitir. Ou sexa, de quen pago máis e mellor para iso.
A cousa non é nova: YouTube xa ten experiencia en suprimir achegas dos internautas logo que de os propietarios desas achegas apelasen aos seus dereitos. Con todo, a situación da que falamos é un pouco distinta, posto que debe ser a primeira vez na historia de YouTube en que esa petición se fai expresa previamente ao evento que aos responsables do mesmo lles cómpre protexer.
Así, a petición ten máis feitura de orde que outra cousa, respondendo a mesma ao desexo da FIFA de ver un YouTube completamente ceibe de imaxes do acontecemento deportivo, que se dá a casualidade de que aínda non comezou (faino o vindeiro venres 11 de xuño). Con este fin e para curarse en saúde, Google (propietaria de YouTube) dará renda solta perante a FIFA a unha ferramenta chamada Video ID, que por tradición lles serve aos propietarios de dereitos de autor sobre determinado material audiovisual a localizalo en YouTube e suprimilo. No caso concreto do Mundial, usarase para bloquear os contidos ligados ao mesmo.