A Campus Party máis “verde” abre hoxe as súas portas coa previsión de 7.460 participantes

Party grande, ande ou non ande. Se cadra esta máxima tan tradicional e tan galega non é finalmente nin tan tradicional nin tan galega, e en Valencia os internautas teñen a súa versión particular na súa propia lingua. Estas son as cousas que se nos veñen á cabeza coa nova edición da Campus Party, o encontro informático de máis sona que se organiza naquelas terras e, para moitos especialistas na Rede, un dos máis salientable do mundo. Polo menos, no que a volume de xente reunida non semella que teña parangón: ás 12.00 horas de hoxe luns 23 un total de 7.460 internautas inscritos previamente petarán na porta da Feria de Valencia, o edificio deseñado por Santiago Calatrava que acollerá as diferentes actividades deste evento xuvenil e principalmente masculino (e tanto, porque o 70% dos asistentes ten menos de 25 anos e a taxa de mulleres anda a rentes do 12%).
Polo que respecta ás novidades, que, xunto cos récords de asistencia son o anzol no que trabamos os medios de comunicación, cómpre sinalar que semella haber moitas e para escoller. Nesta web xa temos falado dalgunha que outra, pero sen lugar a dúbidas quedámonos agora coa seguinte, con independencia de que sexa ou non unha novidade “quedabén” (presentada para contrarrestar as críticas á moita enerxía consumida durante estas xornadas no devandito recinto): este ano achegarase a plantación dunha árbore por cada “campuseiro” participante. A medida susténtase no seguinte: cada unha desas árbores contribuirá (cada ano) a retirar da atmosfera 2.200 quilogramos dos gases que provocan o quecemento da Terra.
Sexa como sexa, as novidades desta edición non se limitan a un escoramento cara unha concepción máis “verde” da enerxía. Así, cómpre sinalar que probablemente esteamos perante o comezo dunha nova era para as partys e os encontros informáticos en xeral baixo teito: a era da deslocalización. Dito doutro xeito: as partys máis importantes van saír dos seus límites físicos e virtuais, e a Campus Party non será unha excepción, posto que na axenda dos organizadores figura desenvolver edicións anuais en 14 países de todo o mundo, sendo o primeiro encontro en Sao Paulo, entre o 11 e o 17 de febreiro.
A maiores, sinalar que a Campus Party inclúe este ano unha área para presentar os últimos avances tecnolóxicos en materia de gadgets, computadores e lecer dixital (Campus Futuro) e que tamén servirá para presentar o proxecto Vidiface, desenvolvido en Bolonia, que vai encamiñado a permitirnos controlar os obxectos que aparecen na pantalla do computador a través dunha interfaz.
Nesta edición 2007, o evento divídese en oito áreas: Astronomía, CampusBot (robótica), CampusCrea (creatividade), Desenvolvedores, Xogos, Modding (deseño vangardista para os ordenadores), Simulación e Software Libre.