Só un 5,77% dos e-mails enviados no pasado verán eran correos legais

O correo electrónico de valor é hoxe en día un luxo. O normal e cotián, para o común dos mortais, é unha morea diaria de e-mails sen senso e sen ningún tipo de valor. En cadea, ocupando rede e facendo que perdamos tempo separando o gran da palla. En realidade, ocorre máis ou menos o mesmo que co correo tradicional (que hai tempo que ten máis palla ca gran), só que no caso do dixital a mala fe dos remitentes estraga en ocasións as moitas vantaxes do formato, tendo en conta as tentativas sen conto de suplantación de entidades bancarias ou de iniciativas de suposto altruísmo económico. Dito para que se entenda: a bandexa de entrada do correo electrónico aseméllase cada día máis á papeleira.
Segundo un novo estudo da firma Panda e do que se fai eco Baquia.com, tan só un 5,77% dos e-mails que chegaron ás empresas durante o terceiro trimestre do ano 2008 eran lícitos, fronte a case un 92% do spam e o 2,3% de malware.
O estudo en cuestión, feito sobre 123 millóns de mensaxes, bota luz sobre a natureza desa porcentaxe pequena pero cen por cen preocupante de correos malware, entre os que cómpre salientar a presenza do verme Netsky.P e os troianos SpamtaLoad.DO e SpamtaLoad.CZ. Polo que respecta ao groso do paquete, o spam propiamente dito, sinalar que o hai de todos os tipos, sendo tamén frecuente a mestura de formatos e obxectivos: mensaxes con corpo en aparencia normal, preferentemente de nova, que logo descargan infeccións cando cliquamos para máis información.
Un exemplo disto foi o envío masivo de supostos estoupidos da terceira guerra mundial que comentamos nesta mesma web. Por certo que no informe de Panda indícase que o repunte na circulación de spam pola Rede rexistrouse no mes de agosto, cun 93% de porcentaxe, en boa medida tirando partido do meirande tempo de lecer dos internautas e da baixada de garda das empresas, institucións e entidades.
A temática é a de costume, sendo os milagres para incrementar a potenciación sexual os máis abondosos reclamos (23%), seguidos de produtos farmacéuticos e empréstemos.