Gong: o primeiro software libre específico para a xestión das ONGs

O software libre acáelle a todos os ámbitos coma se dunha luva universal se tratase. Porén, hai algúns eidos onde é especialmente indicada a súa procura, máis que nada polo que ten de accesibilidade económica e de capacidade de adaptación a diferentes contornas de traballo. Por exemplo: o eido das organizacións non gobernamentais que se dedican, sen arela de lucro, a mellorar no posible a calidade de vida das persoas que viven á marxe das liberdades e dos recursos básicos. Neste senso, ferramentas como a que se vén de presentar no marco da Conferencia Internacional do Software Libre de Málaga (na que houbo, por certo, ampla participación galega) cobran gran relevancia. Falamos de Gong, un sistema de xestión que, por unha banda, permitiría minimizar a dependencia destas entidades cunha boa parte das empresas que desenvolven software (andando en moitas ocasións detrás delas para que lles boten unha man) e, pola outra, sitúaos en posición de tirar partido integral das máis innovadoras tecnoloxías.
Segundo se conta en Publico.es e máis en AGNIX, o programa en cuestión, malia estar aínda en fase de desenvolvemento, xa se sitúa como unha boa alternativa aos programas tradicionais de xestión empresarial, dos que por certo recolle unha boa cantidade de feituras e servizos.
A ferramenta, que coma os sistemas do eido corporativo incorpora aplicacións para a contabilidade e o manexo da información sobre clientes e provedores, vai alén da natureza mesma destes sistemas singularizándose no panorama informático internacional. E, de ir tan lonxe, preséntase de feito como a única opción existente a día de hoxe con características exclusivas para o funcionamento dunha ONG. Esta feitura de especie única refórzase asemade co seu prezo: cero euros.
A ferramenta, que é froito dunha iniciativa de CENATIC para promover o emprego e difusión de software libre, xurdiu como unha maneira de encher un oco: perante a falta de interese económico, non había compañías que quixeran facer algo específico para o eido das entidades sen arela de lucro. Deste xeito, CENATIC sacou a concurso o proxecto para as empresas de software libre que quixeran animarse a desenvolver este programa de xestión, sendo Entel, finalmente, a empresa adxudicataria.