O xogo humanitario Food Force preséntase na Campus Party Iberoamérica

Malia que non hai videoxogo no mundo que sexa quen de erradicar os males da sociedade actual, non está de máis que estean a desenvolver propostas con esta arela. Sobre todo se temos en conta unha vez máis a necesidade de atopar sempre a mellor canle e formato de expresión: de pouco serve pedir que se acabe a fame no mundo no máis alto dunha montaña. Cómpre baixar ao medio de miolo, e un dos miolos da era dixital, no que a mocidade se refire, é o eido das consolas e dos computadores. Este é o obxectivo do Programa Mundial de Alimentos: descender ao nivel de usuario e pola vía do lecer dixital.
O escenario elixido para dar a coñecer a versión español da súa proposta: a Campus Party Iberoamérica. A iniciativa, chamada Food Force, é un intento de unir dous extremos e facelos compatibles. Por unha banda o dos videoxogos, en ocasións un pouco frívolo. E pola outra o das mobilizacións a prol dos dereitos, da igualdade e da paz, ás veces afastadas dos cidadáns que dirixirán o planeta o día do maña. O xogo en cuestión, proposto coma un reto directo ao usuario (que terá que facer todo o posible para erradicar a pobreza e a fame no mundo), desenvólvese en clave de aventura e/ou acción humanitaria.
A idea é convidarnos a localizar dende un helicóptero os espazos concretos onde a xente conta con menos recursos, logo de fuxir dunha guerra ou dunha seca prolongada. Logo disto, o xogador vese obrigado a coordinar os esforzos a desenvolver. Trátase dun videoxogo de tipo educativo que, segundo informa Elpais.com, segue un pouco o ronsel de Sim City. Por certo que o obxectivo da plataforma é lanzar a versión en español este xoves, coincidindo co Cumio Iberoamericano e coa Campus Party Iberoamérica, encontro de alcance internacional no que se agarda reunir a máis de 600 especialistas den redes de todo o eido hispano falante.