O BNG reclama unha estratexia común na UE para loitar contra os delitos na Rede

Logo de ler que nun recente informe de Delincuencia Económica da Dirección Xeral da Policía se anunciaba a“eclosión dos timos bancarios en liña” así como a “impotencia policial para deter aos autores de destes delitos”, o senador do BNG, Xosé Manuel Pérez Bouza, decidiu presentar perante o Goberno unha iniciativa na que demanda “a adopción dunha lexislación común sobre delitos informáticos que permita acabar cos paraísos dende os que operan os ciberdelincuentes”.
Pérez Bouza lembra que o comercio electrónico “experimentou un medre exponencial nos últimos anos”, acadando o pasado ano unha facturación no Estado español de 4.700 millóns, cun incremento do 71,5% con respecto ao ano 2006 e advirte que “este espallamento das operacións bancarias a través de Internet viuse acompañada tamén dun medre dos delitos informáticos”.
Ante esta situación, o senador do BNG considera que “é da máxima urxencia acompañar a existencia dunha rede de transaccións a escala planetaria, como é Internet, dunha lexislación aceptada por todos os estados na que se tipifiquen os delitos informáticos, e se estableza a súa persecución e sanción”.