Afiánzase en Euskadi o uso da Rede como canle de venda directa dende o rural ao fogar

Na liña de Granxafamiliar.com, a plataforma galega para venda de produtos da terra sen intermediarios e a través de Internet (plataforma que por certo non para de medrar, en maior medida agora que os produtos do rural son máis anticrise económica que nunca), o tecido agrogandeiro de Euskadi está cada vez máis preto do consumidor. E isto, aínda que sexa de maneira paradoxal, estase a acadar grazas á intermediación directa dun espazo teoricamente alleo para as actividades xerais do sector primario: o espazo en liña. Máis polo miúdo, e segundo conta o xornal 20 Minutos, xa hai arestora 400 vascos e vascas recibindo no seu fogar produtos distribuídos por 150 agricultores e gandeiros de Euskadi. O trasfego de produtos non tería máis transcendencia se non fose por un par de detalles que achegan particularidade ao tema: lévase a cabo a través das ferramentas da Rede e non hai neste proceso nin rastro dos axentes que nos últimos tempos máis gravaban e entorpecían a venda e distribución deste tipo de bens: os intermediarios.
Os produtos son en boa medida os mesmos cós da experiencia galega devandita: dende ovos a queixo, pasando por carnes de todo tipo, mel, licores ou hortalizas. A idea é a de apostar por un trato xusto co consumidor en todo o de amplo que ten a expresión: amais de ceibalo dos gravames dos intermediarios e de indicarlle ás claras para quen vai ir o diñeiro que paga, dáse a casualidade de que os produtos son todos eles ecolóxicos: non se usan nin pesticidas, nin aditivos nin manipulacións transxénicas.
Esta aposta polo xogo limpo, en troques de supoñer un incremento nos prezos, fica no ámbito do que se podería chamar competitivo grazas precisasemente á inexistencia de unha figura que infle os custes.
A iniciativa, que vén da man do sindicato agrario EHNE, vai dirixida a facer fronte común e a reunir nunha única rede ás ligazóns entre produtor-conxumidor que ata o de agora eran máis ben círculos pechados sen apenas contacto entre eles. Con este fin están a dar forma á rede Nekasarea, unha plataforma dirixida a espallar e afianzar a práctica da venda directa entre cidadáns e explotacións agrogandeiras. Neste senso é onde se sitúa, aínda que a un nivel máis pequeno, a Ekoetxea de Bilbao, rede que reúne a varios grupos de venda directa e agricultores e que en certa maneira está a servir de inspiración para o labor despregado por EHNE.
Por certo que a nova está estes días referenciada en Chuza!, onde os internautas galegos subliñan non só os paralelismos da experiencia coa liña de traballo de Granxafamiliar, senón que tamén salientan a potencialidade dun modelo coma o devandito aplicado a toda a nosa xeografía.