Intel presentou oficialmente os procesadores Xeon 5500

Intel presentou hoxe 17 novos procesadores dirixidos ao uso corporativo encabezados pola familia de procesadores Intel Xeon 5500, antes coñecidos polo nome chave Nehalem-EP, que ofrece unha chea de novas tecnoloxías que contribúen á mellora de velocidade e versatilidade como Intel Turbo Boost, Intel Hyper-Threading ou unha nova xeración da tecnoloxía de virtualización que permite ao sistema adaptarse a distintas cargas de traballo.
O vicepresidente senior e director xeral do Digital Enterprise Group de Intel, Patrick Gelsinger, asegurou que esta nova familia de procesadores crea «oportunidades para solucionar os retos máis complexos do mundo e dá un pulo aos límites da ciencia e a tecnoloxía».
Os novos procesadores darían o maior salto de rendemento dun procesador Intel Xeon na historia, dobrando á súa anterior xeración (Intel Xeon 5400), e os seus prezos estarán entre os 188 e os 1.600 dólares (en grandes cantidades), aínda que cómpre lembrar que o seu uso principal é para servidores corporativos.