Os fabricantes de informática buscan incluír Windows 7 na nova xeración de ultraportátiles de baixo custo

Os fabricantes de ultraportátiles de baixo custo atoparon certo rexeitamento inicial por parte dos consumidores á hora de vender os seus equipos con Linux preinstalado, polo que optaron a ofrecelos principalmente con Windows XP, pero agora están a pensar na seguinte xeración de software, e tras desbotar a instalación de Windows Vista, teñen a vista posta no Windows 7, o que está a espertar moitas incógnitas, porque os fabricantes deberán elixir entre a versión Starter Edition (que tería limitacións coma non permitir máis de 3 aplicacións simultáneas, e estaría dirixido a países en vías de desenvolvemento) ou a Home Premium (que parecería a máis axeitada, pero tería un prezo superior).
Supomos que nos vindeiros meses Microsoft negociará caso a caso o tipo de licencias que aplicará en cada caso, e os fabricantes pretenden ser capaces de vender no vindeiro Nadal ultraportátiles a só 200 dólares, polo que o prezo do sistema operativo sería un factor decisivo.
Os ultraportátiles de baixo custo están a forzar a creación de rangos de prezo inéditos, con marxes de beneficios moi reducidos, polo que a complicidade de Microsoft é necesaria (especialmente porque moitas das prestacións de Windows 7 contribúen á mellora da autonomía de equipos portátiles ou á explotación dalgunhas das súas últimas características, algo que Windows XP non fai).