Nokia compara o WiMAX co Betamax

A pouca fortuna da versión do Nokia N810 con conectividade WiMAX que chegou ao mercado norteamericano o pasado verán levou ao fabricante finlandés a descontinualo o pasado xaneiro, e agora dende a compañía van moito máis aló ao declarar un dos seus directivos, Anssi Vanjoki, que «non penso que o futuro (do WiMAX) sexa moi prometedor. Este é o clásico exemplo de choque de estándares industriais, e un chegará e outro terá que perder. O Betamax estivo durante bastante tempo, pero o VHS dominou o mercado. Vexo que o mesmo está a pasar aquí».
Comparar o WiMAX co Betamax ten moito sentido dende a perspectiva de Nokia, compañía enfocada á telefonía móbil, sector que está a achegarse ao estándar 4G coñecido coma LTE, deixando de lado o WiMAX (que conserva un importante apoio por parte de Intel), que está a verse máis como unha evolución do Wi-Fi. Teriamos así unha repetición do enfrontamento entre Wi-Fi e 3G, que na práctica non foi tal, quedando cada un en mercados distintos, aínda que dende Nokia prefiren centrar os seus esforzos na tecnoloxía LTE, que estiman que en 2015 conte con cobertura na meirande parte do mundo.