Alertan da posibilidade de desaparición dos dominios .tv por mor do cambio climático

Os dominios de primeiro nivel de 2 carácteres serven para representar a países, pero algún destes sufixos na Internet están a utilizarse de distintos xeitos, como demostran os .tv e os .fm, que en moitos casos acollen a páxinas web de emisoras de televisión e radio respectivamente, pero este tipo de práctica pode ter problemas a longo prazo, ou así o entenden dende o rexistrador GoDaddy, que advirte aos seus clientes cando intentas rexistrar un dominio .tv que a illa de Tuvalu (á que pertence o dominio) está afundíndose polo que nun futuro podería desaparecer.
Actualmente a illa á que pertence o dominio .tv está a só 5 metros sobre o nivel do mar, e o cambio climático podería levar a desaparecer coma país, pois a súa poboación podería ter que emigrar. Cómpre destacar que a principal actividade económica de Tuvalu é precisamente o rexistro de dominios .tv, e incluso pensamos que ante un afundimento da illa ICANN podería optar por manter os dominios rexistrados un tempo prudencial, pero resulta evidente que unha empresa que queira construír unha marca na Rede non debería utilizar un nome de dominio que dependa dun elemento tan incontrolable coma o nivel do mar.