Denuncian que certos trebellos sen fíos prexudican seriamente ás redes Wi-Fi

As redes Wi-Fi domésticas funcionan na banda dos 2,4 GHz, que ten como serio problema o ser libre, de xeito que non só a empregan redes de datos, senón tamén moitos dispositivos sen fíos coma cámaras de vixilancia, monitores para bebés e transmisores de audio e vídeo, que saturan o espazo radioeléctrico e crean interferencias entre si (ao que tamén habería que sumar os efectos dos fornos microondas).
Aínda que o asunto non pareza preocupante, dende o Reino Unido un informe destaca que nos centros urbanos comeza a ser un serio problema, e non especialmente pola proliferación de redes Wi-Fi, senón precisamente polo resto de trebellos que fan un uso intensivo desta banda libre, o que fai que moitos dispositivos non operen correctamente ou que as redes sen fíos padezan cortes e mesmo chegue a ser imposible o seu uso. A xente de Mass Consulting conclúe que sería necesaria unha regulación para o uso da banda libre, de xeito que os trebellos coma os transmisores de vídeo sexan respectuosos coas redes Wi-Fi (o que mesmo podería completarse cunha especie de selo de calidade, que podería ser decisivo para un usuario que non tivese que elixir entre conectarse á Internet ou monitorizar ao seu fillo pequeno).