Anuncian os prezos de Windows 7, podendo quedar Europa fóra das súas promocións de lanzamento

Este venres comeza nos EE.UU. o programa de actualización a Windows 7, de xeito que quen merque un ordenador con Windows Vista poderá pasar ao novo sistema operativo de Microsoft cando chegue definitivamente o vindeiro 22 de outubro, podendo obterse máis información sobre o tema nunha páxina web creada para tal efecto.
Pero polo momento a Windows 7 Upgrade Option sorprende por non contar polo momento cunha versión europea e, de feito, dende Ars Technica aseguran de que é posible que a versión de Windows 7 que veremos a este lado do Atlántico non só carecería do Internet Explorer preinstalado, senón que tamén podería prescindir as ofertas de actualización que lanzan nos EE.UU., aínda que a decisión final aínda non está tomada, pero de ser así o malestar entre o público europeo sería evidente.
Algunhas tendas tamén comezarán a aceptar vendas anticipadas de actualizacións a Windows 7 (por tempo limitado) que sairían a prezos que parten de só 49,99 dólares, o que animaría a moitos usuarios a dar o salto ao novo sistema operativo.
Microsoft tamén anunciou os prezos definitivos de Windows 7, que de xeito xeral será 40 dólares máis barato que Windows Vista, de xeito que a versión completa de Windows 7 Home Premium custaría 199,99 dólares, mentres que a súa actualización dende Windows XP ou Vista custaría 119,99 dólares, aínda que dende a compañía de Redmond deixan claro que en mercados seleccionados farán ofertas de lanzamento (agardemos que chegue algunha a España).