A web foi a principal fonte de información sobre o falecemento de Michael Jackson

O pasamento de Michael Jackson provocou un alude de visitas ás páxinas web que informaban en primicia sobre o acontecemento, adiantándose aos medios de comunicación tradicionais, alzándose coa meirande parte da atención a web de rexouba TMZ, que foi a primeira en dar a nova do ingreso hospitalario de Jackson por unha parada cardíaca, o que provocou que o espazo chegase a estar fóra de servizo durante varios minutos, incapaz de atender a demanda global de información ao respecto, o que afectou tamén ao célebre blog de Pérez Hilton (xestionado por un descendente de galegos), tamén fóra de liña durante minutos, posto que os visitantes que tiñan problemas para entrar en TMZ dirixíanse automaticamente ao seu outro referente de lareteos.
As informacións publicadas nestes medios dixitais amplificáronse por plataformas sociais coma Twitter e Facebook, que tamén tiveron certos problemas para soportar a actividade en certos momentos, no que algúns xa aseguran que non pasaba dende a toma de posesión de Barack H. Obama.
De todos os xeitos, non foi ata que Los Angeles Times confirmou a nova que os medios de comunicación tradicionais atrevéronse a publicar a nova da morte de Jackson, o que tamén provocou problemas de funcionamento na web informativa norteamericana.

Podemos lembrar así coma os medios dixitais son capaces de roubarlle o protagonismo aos tradicionais, que incluso chegaron a errar ao informar sobre a nova (a CNN publicou que reanimaran a Jackson antes da súa chegada ao hospital), no que parece un exceso de prudencia por non considerar fiables ao medios nativos dixitais (o que posiblemente teña que cambiar no futuro, de non querer perder relevancia coma fontes de información).
Tralo espallamento da nova, moitos famosos comentaron os feitos a través de Twitter (dende Arnold Swarzenegger ata Miley Cyrus), e incluso os blogs especializados en videoxogos quixeron render homenaxe ao Rei do Pop lembrando as súa achegas ao sector, pois Jackson protagonizaba o xogo Moonwalker (baseado na película do mesmo xogo), aparecía coma personaxe nas dúas entregas de Space Channel 5, fixo un cameo en Ready 2 Rumble Boxing: Round 2 e incluso hai rumores de que colaborou (sen acreditar) na banda sonora de Sonic the Hedgehog 3. Tamén leva uns días circulando o rumor de que MJJ Productions estaría a traballar na creación dun xogo de Michael Jackson para Wii, PS2 e PS3 que sairía para o vindeiro Nadal.