HP presenta 2 plataformas de impresión baixo demanda

Esta semana durante o congreso Web 2.0 a xente de HP presentou dúas iniciativas dirixidas á impresión baixo demanda de libros e revistas (ambas coñecidas dende hai meses). Por unha banda teriamos a BookPrep, que permite encargar copias en papel en formato de peto duns 500.000 títulos da biblioteca da Universidade de Michigan (a meirande parte impresos antes de 1.923 e practicamente imposibles de conseguir nas librarías), dando certa liberdade ao usuario (que pode deseñar detalles como a portada ou a maquetación do libro) e facilitando a adquisición dos volumes físicos a través de Amazon.com.
Pola súa banda, o servizo MagCloud estrearía a súa beta, permitindo a creación de revistas a un prezo de 20 centavos de dólar por páxina e incluso conta coa posibilidade de producir publicacións tomando coma base artigos da Wikipedia. Este sistema contarían con servizos de impresión distribuídos xeograficamente de xeito que as revistas imprimiríanse o máis preto posible do seu comprador.
Ambas plataformas de impresión fan uso de tecnoloxía de HP, e aínda que os tempos vaia cara aos soportes dixitais, os usuarios seguen a gustar do papel para a lectura, e o feito de poder publicar libros e revistas baixo demanda pode ser un complemento ideal para as edicións electrónicas, eliminando de paso a sobreimpresión (pois os volumes só se producen cando son encargados, e non terían unha alta taxa de devolución coma acontece con moitos medios impresos na actualidade) o que podemos ver como unha vantaxe tanto económica coma ecolóxica.