Presentan en Lugo unha ferramenta web para a xestión de competicións de tenis e pádel

Tenis Manager, S.L., empresa creada en 2010 nos viveiros da Fundación CEL-Iniciativas por Lugo, presentou hai poucos días o seu proxecto empresarial e a páxina web que dará soporte aos seus contidos, orientada fundamentalmente ao mundo do tenis, e que busca converterse no punto de encontro en España entre xogadores e organizadores de competicións de tenis e pádel. Os promotores da empresa presentaron tamén SportPlanner, unha innovadora aplicación aloxada na web que permitirá a xestión de torneos en todo o territorio nacional de forma totalmente informatizada, rápida, simplificada e económica.
A presentación tivo lugar no Pazo de Feiras e Congresos de Lugo, e contou coas intervencións de Ignacio López López, xerente e CEO de Tenis Manager S.L., que explicou as características do proxecto empresarial; José Antonio Pereiro Rodríguez, presidente da Federación Galega de Tenis, organización que vai utilizar esta ferramenta no proceso de modernización tecnolóxica da súa actividade, e de Luís García Santalla, presidente da Fundación CEL.
Os responsables do proxecto aseguran que «a idea naceu ao detectar un claro déficit de ferramentas web para a organización de torneos» (aseguran que non existe en España unha aplicación web como SportPlanner).
Ademais da aplicación de xestión de torneos SportPlanner, Tenis Manager proporcionará a través da súa páxina web unha serie de servizos de información e contacto destinados ós «profesionais dos distintos grupos que conforman o variado universo que se crea ao redor deste tipo de deportes». Así, pretende ser unha «ferramenta de uso cotián no día a día do tenista ou xogador de pádel federado, xa sexa profesional ou amateur, e das escolas e clubs de tenis e pádel». A posta en marcha dun sistema de xestión de torneos a través de Internet como SportPlanner simplificará enormemente a organización deste tipo de eventos, co consecuente aforro de custos e tempo.