As vantaxes e riscos das TIC na docencia, a exame no Campus de Pontevedra

A Vicerreitoría do Campus de Pontevedra, co fin de botar luz sobre os camiños máis axeitados da relación TIC-docencia, organiza un ciclo de conferencias sobre Educación e Comunicación durante marzo e abril e que bota a andar este martes na Casa das Campás coa intervención de Juan José Perona, que afondará nas potencialidades da radio como soporte educativo. Segundo explica Ana Belén Fernández Souto, directora da Área de Extensión Cultural e Estudantes, estas xornadas buscan “mesturar dous eidos nos que temos presenza, a educación e a comunicación, co fin de amosar os beneficios e desvantaxes das novas tecnoloxías nas aulas e do seu uso por parte dos menores”.
As xornadas serán de balde e estarán abertas a toda a cidadanía, aínda que foron estruturadas para o alumnado do devandito Campus e para o profesorado dos centros da contorna.
Tras a intervención de Juan José Perona, profesor da Universidade Autónoma de Barcelona, o próximo martes, a seguinte cita será o 10 de abril con Gonzalo Sotelo, membro do equipo de investigación de Delitos Tecnolóxicos da Garda Civil de Pontevedra, que abordará, entre outras cuestións, a situación dos menores ante as novas tecnoloxías.
O 17 de abril, a Fundación Alia2 advertirá da desprotección de nenez en Internet e facilitará ferramentas a proxenitores e docentes para actuar en situacións de risco na rede. O ciclo pecharao o vindeiro 24 de abril Isabel Suárez, profesora na titulación de Publicidade e Relacións Públicas, que disertará sobre o emprego das redes sociais na educación.