Máis de 11.000 docentes galegos recibiron formación sobre o uso das TIC ao abeiro do Proxecto ABALAR

A Consellería de Cultura, Educación e Ordenación Universitaria ten formado xa a preto de 11.000 docentes (coordinadores e profesores implicados) no uso das TIC no marco do plan de formación do Proxecto ABALAR, polo que se están a transformar os centros educativos tradicionais en centros educativos dixitais e impulsar un cambio de modelo educativo en Galicia apoiado na formación do profesorado e a modernización do ensino.
Para iso, a Consellería está a fomentar a cultura dixital na práctica educativa, imprescindible para acadar a integración das TIC en todos os ámbitos do proceso educativo; o que se traduciu no deseño dun plan de formación específico para a habilitación do profesorado no uso das TIC na docencia, e na posta en marcha de charlas dirixidas ás familias.
Así, téñense formado a 434 coordinadores nos centros Abalar e 10.506 profesores, a través de 600 accións, o que supón máis de 25.000 horas de formación específica impartida. Doutra banda téñense impartido 238 charlas no marco do Plan Navega con Rumbo, e 220 charlas no do Plan Coñece o espazoAbalar, dirixidas a que as familias poidan coñecer as vantaxes que a plataforma do proxecto lles ofrece para o seguimento da vida académica dos seus fillos.
Tanto profesores como familias teñen á súa disposición, ademais, os diversos materiais didácticos que ofrece o Repositorio de Contidos Dixitais (enmarcado no espazoAbalar, plataforma web do Proxecto), que conta xa con 960 recursos, un 26% máis que o curso pasado.