O CESGA pon ao día os recursos de seguridade da rede de comunicacións

O Centro de Supercomputación de Galicia vén de realizar unha renovación da súa infraestrutura interna de comunicacións. Os traballos desenvolvéronse ao longo dos últimos meses, sendo o obxectivo o de facer fronte ás necesidades de lonxitude de banda dos servidores do centro galego, dun tempo a esta parte especialmente rebordantes de servizos. Asemade, buscouse con estes labores de posta a punto afrontar a actualización dos sistemas de seguridade na rede e máis o seu mantemento, “como consecuencia da mellora no caudal de accesos de comunicacións da Rede de Ciencia e Tecnoloxía de Galicia, RETETGA”, segundo indican fontes do CESGA.
Estas renovacións, que foron posibles en virtude dos fondos FEDER, contaron coa experiencia tecnolóxica das firmas Emetel e Telindus. De feito, en Código Cero xa temos falado en detalle do que implicaba para a seguridade do centro galego e das súas actividades a achega da firma galega Emetel.
Volvendo aos traballos despregados, dicir que foron encamiñados en boa medida a garantir a mellor rendibilidade posible en base a unha listaxe de plataformas e servizos, do CESGA cara a sociedade galega, que non parou de medrar nestes anos. Por exemplo: accesos a supercomputadores, computación grid e cloud, almacenamento de datos, servidores de mapas, aloxamento de páxinas webs científicas e servizos asociados, sistemas de xestión documental, así como equipamento de colaboración en salas do centro para a realización de videoconferencias ou sesións formativas.
Polo tanto, tiñamos máis de 300 servidores con 4.000 procesadores no CPD (Centro de Procesamento de Datos) do CESGA, todos dependendo cada vez máis do intercambio de datos con outros servidores (internos ou externos ao CESGA), para completar as súas tarefas.
Así, era preciso un importante aumento nas necesidades da lonxitude de banda destes servidores e levar a cabo un incremento do nivel de dispoñibilidade e seguridade na rede, tanto para accesos internos como externos, informa o CESGA.
O primeiro dos contratos, asinado con Telindus, equipou ao centro cun backbone redundado de tecnoloxía 10 xigabit Ethernet “que serve para conectar os diferentes armarios de servidores xa existentes no CESGA de capacidade de 10 Xbps, facilitando que a interconexión entre os equipos suceda a maior velocidade”.
E engádese dende o CESGA sobre a necesidade destes traballos: “O feito de que os equipos de interconexión dispoñan de fontes de alimentación redundante alimentados desde liñas eléctricas diferentes, e que todos os equipos críticos estean así mesmo redundados, fai que unha avaría ou unha intervención programada non supoñan a perda do servizo”.
Polo que respecta ao contrato coa galega Emetel, significou a implantación dunha serie de recursos para reforzar a seguridade da rede. Máis polo miúdo, en palabras do centro, “serviu para integrar unha devasa de alta capacidade que incorpora a funcionalidade de prevención de intrusións e determinación de túneles SSL, que é quen de traballar con amplitudes de banda de 10Gbps, previstas na nova rede RECETGA-NOVA”.
Os beneficios de todos estes traballos son claros, a xuízo do centro galego. En primeiro lugar, danse unhas melloras importantes en protección de datos e comunicacións, “tanto perimetral (administrando a seguridade en todos os accesos de centros ao CESGA) como de contidos (posibilita habilitar servizos antivirus, antispam, control de aplicacións e filtrado de URL’s)”. Asemade, permítese unha optimización no eido da xestión, permitindo o despregue de corta lumes dende o os centros conectados. Amais disto, dase unha mellora da accesibilidade aos servizos desde Internet, en virtude da posta en marcha dun portal web seguro, dende o emprazamento propio do CESGA e a través dos puntos de acceso Wi-Fi.
Como dixemos, o proxecto está financiado polo Fondo Europeo de Desenvolvemento Rexional (FEDER), por medio da axuda de referencia CESG08-1R-003, correspondente ao subprograma de proxectos de equipamento científico-tecnolóxico, da Dirección Xeral de Investigación e Xestión do Plan Nacional de I+D+i do Ministerio de Ciencia e Innovación, (actualmente dependente da Secretaría de Estado de I+D+i, dependente do Ministerio de Economía e Competitividade). O Proxecto está cofinanciado pola Xunta de Galicia, a través da DXIDI e polo CSIC.