O CDTIC acolle esta semana seminarios sobre solucións tecnolóxicas para os sectores do metal e a pedra

O Centro Demostrador TIC organiza, ao longo desta semana, dúas Xornadas Demostradoras orientadas aos sectores do Metal e a Pedra, que terán lugar os días 17 e 19 de abril, respectivamente. En ambas as dúas mostrarase ao tecido empresarial do sector diversas solucións tecnolóxicas que posibiliten a modernización do seu negocio e a mellora do seu posicionamento na economía galega, así como a apertura a novos mercados.
A xornada Solucións Tecnolóxicas para a modernización da Industria do Metal, que se celebrará mañá en horario de 10:00h a 13:00 horas, fará un percorrido por distintas solucións TIC, entre elas, unha ferramenta de xestión integral (ERP) para empresas de fabricación baixo pedido, nacida dentro do sector do metal, que establece a fabricación como o núcleo da xestión e permite a integración das principais áreas da empresa como a xestión de compras, a facturación, recursos humanos, almacén, etc.
Durante a xornada tamén se presentará unha familia de solucións que comprende dende un control de mercadorías por medio de smartphones e comprimidos a unha aplicación de localización xeográfica por GPS dos provedores e clientes da área comercial. Por último, a sesión contará con demostracións de exemplos reais de ferramentas de realidade virtual e realidade aumentada no ciclo de vida do produto dende o deseño, pasando polo desenvolvemento ata a parte comercial e de posvenda en empresas deste sector.
Do mesmo xeito, o próximo xoves 19 de abrir terá lugar unha Xornada Demostradora Solucións Tecnolóxicas para a modernización da Industria da Pedra e Rochas Ornamentais, na que se presentará un ERP concibido especialmente para empresas dedicadas á explotación, almacenamento e transformación de pedra natural e mostrarase como os portais Web facilitan a visibilidade da empresa e os seus produtos e o seu posicionamento en internet. A xornada pecharase con solucións de comercio electrónico con catálogos de produtos en liña que supoñen un caso de éxito no terreo da exportación de produtos, que favorecen a apertura das empresas a novos mercados nacionais e internacionais.
Ambas as dúas xornadas van dirixidas aos profesionais e persoal técnico e/ou xerentes ou directivos de empresas da nosa comunidade, principalmente dos sectores do metal e a pedra, respectivamente.
A metodoloxía definida para este tipo de xornadas persegue conseguir un contacto directo entre a oferta tecnolóxica existente en Galicia e os posibles demandantes desta, a través de demostracións prácticas e a participación activa das empresas asistentes durante a celebración da xornada.
A asistencia é de balde, condicionada ao aforamento do local e previa inscrición en liña a través do portal web do Centro Demostrador TIC.