Homenaxe a Víctor Gulías este venres na FIC

A Facultade de Informática da Coruña, FIC, celebra este venres 27 un acto de homenaxe ao profesor e investigador Víctor M. Gulías Fernández, falecido recentemente. O acto dará comezo ás 19 horas no salón de actos do centro, e estará presidido polo reitor Xosé Luís Armesto Barbeiro, acompañado de varios representantes de distintas universidades, centros de I+D e firmas do sector das novas tecnoloxías coas que o homenaxado mantiña estreito contacto. A Facultade fai extensivo o convite a calquera persoa que desexe asistir a este acto.
Como lembraremos, Gulías faleceu o pasado 28 de xaneiro, aos 41 anos de idade. Gulías, claro referente da formación e a investigación tecnolóxica en Galicia, dirixía o Centro de Investigación en Tecnoloxías da Información e as Comunicacións (CITIC) e era profesor titular da Facultade de Informática da Universidade da Coruña, amais de socio fundador de LambdaStream, firma nacida ao abeiro da devandita Universidade.
Gulías tamén destacou polo seu espírito emprendedor, pois xa estaba involucrado nun novo proxecto, Syntheractive, spin-off da UDC que está a desenvolver unha plataforma para crear contidos televisivos 2D e 3D interactivos.