Panini súmase á distribución dixital de comics

Panini Comics, editorial que distribúe en España numerosas coleccións da Marvel e doutras compañías, estrea hoxe Panini Digits, unha plataforma de cómic dixital que conta con presenza en Italia, Francia, Alemaña e España, e que inicialmente conta con títulos como Scarlet de Brian Michael Bendis e Alex Maleev, Criminal e Incognito de Ed Brubaker e Sean Philips, Rage (adaptación do videoxogo dos creadores de DOOM e Quake)… e mesmo estrea a nova liña de comics de Stan Lee para Boom Studios (con StarBorn, The Traveller e Las Crónicas del mundo emergido), que estarán dispoñibles dende a páxina web de Panini Digits ou a través da súa aplicación móbil para iPod Touch, iPhone e iPad (nos dispositivos con Android pode accederse aos contidos vía web).

Moitos dos títulos distribuídos dixitalmente coa súa numeración norteamericana xa foran editados inicialmente soporte físico en España en formato de tomo, polo que a oferta dixital é bastante diferente, de xeito que poden adquirirse os 5 primeiros números de Scarlet por 0,79 euros cada un (3,95 euros en total) mentres que o volume en papel e e con tapa dura comercialízase en España por 19,95 euros. Deste xeito o formato dixital mellora en dispoñibilidade e prezo a oferta tradicional.
Os contidos de Panini Digits tamén estará dispoñibles a través da plataforma dixital española Koomic e compartindo a súa filosofía multiplatforma (os contidos adquiridos na web poderán consultarse en dispositivos móbiles e viceversa).
Con esta aposta dende Panini demostran non ser alleos ao mundo editorial actual, quedando aínda moito que avanzar neste ámbito en España, onde continúan a estar ausentes as principais coleccións de banda deseñada.